Shillong, Ïaïong:
Wat la na ka liang u Commissioner ka tnad Transport ka Sorkar Jylla, Bah E. Kharmalki, u la kren shai ba ka tnad kan sa leh da kaba tyngeh ïa kito kiba dang ïai kamai bad ka kompani Rapido namar ba kane ka kompani ka dei kaba la treikam beaiñ khlem kino-kino ki kot ki sla kiba biang ne wat ka jingsiew khajna sha ka sorkar jylla, hynrei la ïohi pat ba ka jingjyllei jong katto-katne ar shaka ban kamai ka dang ïai paw tyngkreiñ haduh kine ki sngi.
Na ka liang u Bah Kharmalki u la maham jur ruh ba kino-kino ki paidbah kiba dang ïai pyndonkam ïa ka ‘Rapido’ kaba la pyntreikam beaiñ hapoh ka jylla ba lada jia kano-kano ka jingjia ïa ki, kin hap ban bahkhlieh hi ïa la ka jingshngaiñ.
Kumba ka long mynta, ki don tang artylli ki ‘Aggregrator’ ne ki kompani kiba kamai da ki thuk-thuk ar shaka kiba la ïoh ïa ka ‘Permit’ kaba biang bad kine ki kynthup ïa ka JETS 24×7 bad ka Any Ride.
La ïohi ba ha ka 4 tarik u Ïaïong 2024, na ka liang ka Synjuk Ki Nongñiah Taksi Sor bad Khapsor hadien ba ka la ïoh pdiang ïa ki jingujor ba ki ju don ki thuk-thuk kiba la shu wan ïeng ha ki thaiñ Rynjah ban kamai, kumta na ka liang katei ka synjuk ka la leit ban kren bad pynsngewthuh ïa kitei ki nongkamai thuk-thuk ar shaka kiba la kam ïalade ba ki dei kiba kamai Rapido ba kim dei shuh ban kamai bad ka Rapido namar ba ka dei ka kompani kaba la treikam beaiñ.
Haba ïoh ban ïakren bad u Bah Pynsuk Youroi uba dei u General Secretary ka Synjuk Ki Nongñiah Taksi Sor bad Khapsor, u la ong ba ka jingleit jong ka synjuk kam dei ba kan leit ban beh ne ban mai ïa kitei ki samla hynrei ka jingleit jong ki ka long ban pynsngewthuh ïa ki ba ka Rapido ka dei ka kompani kaba la khang pyrshah da ka sorkar bad ka khlem ïoh jingithuh na ka tnad Transport ka sorkar jylla.
“Kaei kaba ngi ai ka long ba ngin pyni ïa ka lynti ka ban pynshai ïa ki ba ka don ka JETS 24×7 mynta bad ki lah ban leit noh lyngba ka App jong kane keiñ, ngi pyni ka lynti ïa ki bad kam dei ba ngi beh ne mai ïa ki kumta, ki dei ki para Khasi jong ngi bad ki khynnah samla ki donkam ban ïoh kam ïoh jam”, la ong u Bah Youroi.
U la ong ba kum ka synjuk ka khlem pynrem ïa ka jingkamai ar shaka jong kine ki khynnah samla hynrei ka synjuk ka pynshlur ïa ki ba kin kamai pat da ka lynti kaba dei.
“Kato ka jingkamai ‘Offline’ ne kaba kamai khlem da pyndonkam da kano-kano ka App ruh katba kim pat ïoh ‘Permit’, na ka liang jong ngi, ngim sngewdei namar ka long beaiñ”, la ong u Bah Youroi.
U Bah Youroi u la ong ba na ka liang ka synjuk ka ju ïai ban jur ruh ïa ka tnad Transport ba ka dei ban leh eiei katkum ka aiñ Meghalaya Taxi Operational Rules 2020 ha kaba ïadei bad kane ka jingdon jong ki nongkamai thuk-thuk kiba kamai khlem Permit.
“Ka jingïai ban jur jong ngi ïa ka tnad ka long ba ka lah ban shna da kano-kano ka aiñ kaba ki lah ban kamai maki namar ka dei ka lad ïoh kam ïoh jam jong ki hynrei lada shah ban ïaid ‘Offline’ ka long kum ka jinghikai ban leh ïa ka bym dei”, la bynrap u Bah Youroi.
“Ngi lah pynshai ruh ba ka Rapido ym lah shuh ban pyntreikam namar ka long beaiñ hynrei ki lah ban leh da ka JETS 24×7 kaba dei ka Aggregator napoh ka jylla jong ngi”, la bynrap shuh shuh u Bah Youroi.
