Shillong, Ïaïong 05
Ka seng Liang Pyrshah ka Indian National Congress (INC) ka la pyllait paidbah ïa ki mat ilekshon sha ka Ïingdorbar Lok Sabha ka ban long ha bun tylli ki wat jingthep ‘vote’ ha kaba ka wat banyngkong kan sdang ha ka 19 tarik mynta u bnai.
Katto-katne ki mat ilekshon ka Congress
Yn pynlong ïa ka khana samari halor ka ïoh ka kot bad ki kynhun jaitbynriew ha ka ri.
Ka jingpynkylla bad kyntiew ïa ka bhah sha ka 50% na ka bynta ki SC, ST bad OBC.
10% ka jingmang ha ka jingai kam bad ha ki jaka pule ïa kiba duna ka ïoh ka kot na bynta baroh ki jaitbynriew.
Yn pyntreikam ïa ka skhim ban ïarap 1 lak shisnem ïa ki longïing baduk ha ka ri.
Yn mynjur ïa ka ‘Right to Apprenticeship Act’ ban ailad ïa ki samla kiba la pyndep Diploma lane Graduate kiba dang hapoh 25 snem ka rta.
Yn mynjur da ka aiñ ban kyrshan ïa ki nongrep Minimum Support Prices (MSP).
Ban pynïoh Jylla biang ïa ka Jammu & Kashmir kaba la pynduh noh mynta.
Yn pynduh ïa ka skhim rung kam shipai (Agnipath).
Ka bai bylla kaba duna eh ha ka ri kan long 400 tyngka shisngi
Yn pynduh ïa ki kam ba shu thung shipor (Contractual) hapoh ka Sorkar bad ki kompani ka Sorkar.
Yn pyndap la jan kot 30 lak tylli ki kam ba sah thylli hapoh ki tnat ka Sorkar Pdeng.
La pyllait ïa kine mat ilekshon ha ka Sngi Thohdieng khyndiat sngi shwa ban long ka ilekshon sha Ïingdorbar Lok Sabha ha ka wat kaba nyngkong.
Ïa kine mat ilekshon la pyllait da u President ka Congress u Mallikarjun Kharge ha ka jingdonlang kiwei ki nongïalam kiba kham rim kum ka Sonia Gandhi, Rahul Gandhi, KC Venugopal, u P Chidambaram bad kiwei kiwei ha Delhi.
Ka mat ilekshon jong ka Congress ka phai bha sha ki 5 tylli ki païa jong ka hok ha ryngkat 25 tylli ki jingpyntikna ïa ki kular.
Haba pyllait ïa ki mat ilekshon, ka Congress ka la kyrpad ïa ki paid nongshong shnong hapoh ka ri ban peit kham palat ïa ka niam, ka ktien, bad kynhun jaitbynriew hynrei ban jied da ka jingstad ban wanrah biang ïa ka Sorkar jong u paidbah.
Ka Congress ka la ong ruh ba kane ka ilekshon Lok Sabha ka wanrah biang ïa ka lad ban pyrkhat ha ban pynkylla ïa ka rukom synshar kaba la dep ïohi bad sakhi ha kine ki 10 snem.
