Seoul, ïaïong:
Ka North Korea ha ka Sngi Balang ka la pynbna ba ka jingpyrshang ban pynher ia u ‘namding ‘Long-range Solid-fuel Hypersonic Missile’ ka la long kaba seisoh.
Ha ka Sngi Ba-ar, la ong ba ki ri kum ka South Korea, Japan bad ka United States ki la pynrem halor ka jingkhlaiñ pynher ‘namding jong ka North Korea bad khamtam ha katei ka sngi la ong ba ka North Korea ka la pynher ia utei u ‘namding ba ka dang dep ban shna thymmai sha ki bynta duriaw jong katei ka ri ha ka Sngi Ba-ar.
U nongialam ba hakhlieh jong ka North Korea- u Kim Jong Un, ha ka Sngi Balang u la iathuh ba ka North Korea ha katei ka sngi ka la lah ban pyn urlong ia ka jingthmu jong ka bad ia ki jingpyrshang da utei u jait ‘namding uba khlaiñ bor bha bad uba thymmai eh ba ka North Korea ka dang pynmih ha kane ka kynti.
Hynrei, haba iadei bad ka jingpyrshang pynher ‘namding jong ka North Korea, kitei ki ri ba marjan naduh ka South Korea, ka Japan bad ka United States ki ju maham tyngeh ia ka North Korea ba kam dei ban pynjur ia katei ka jingpynher ‘namding namar ka long kaba buh jingma ia kitei ki ri ba marjan lada kitei ki ‘namding ki leit poi bakla shapoh u pud- u sam jong ki.
Namar la ong ba ka North Korea ka long ka ri kaba khlaiñ tam eh ban pynher ‘namding bad ban pyrshang pynher ‘namding na ka por sha ka por wat hapdeng ka jingbyrngem bad ba la khang pyrshah da kitei ki ri ba marjan.
