Mawkrwat, Ïaïong 05
Ka Mawkyrwat District Cycling Association (MDCA) bad ka Hynñiewtrep Youths’ Council HYC Mawlangwir Unit ki la pynkup burom ïa u Kevin Lyngdoh Sang-riang uba la wanrah nam bad burom ïa ka Jylla hi baroh kawei da kaba khur ar tylli ki takma rupa ha ka XCO na ka 20th National MTB Championship kaba la long naduh ka 28 haduh 31 tarik u Lber ha Panchkula Haryana ba la pynlong da ka Haryana Cycling Association kaba hap hapoh ka Cycling Federation of India.
Ha kane ka jingpynkup burom kaba la long ha ka Sngi Palei na ka liang ki nongïalam jong ka MDCA, kumjuh u DSO South West Khasi Hills District u Bah Damang Syngkon bad kumjuh ruh ka seng HYC, ki la ai jingïaroh bad ka burom ka leit sha u Kevin Lyngdoh Sangriang bad ka ïing ka sem ba ki la kyrshan ïa u haduh ba un da poi sha kane ka thong.
Shuh shuh ki la ai ki kyntien kyrkhu kyrdoh lyngba da ki jingsneng jingkraw ba nangne shakhmat ba un nangtrei shitom shuh shuh ha ki kam ïalehkai ha ryngkat bad ki jingpule khamtam ban kiar na ki kam ba sniew, ai ba ka nam jong u kan ym kut tang hapoh ka ri, hynrei wat haduh shabar ri ruh kumjuh.
Na ka liang u Kevin u la pynpaw ka jingsngewnguh ia ki nongïalam jong ka MDCA, ïa ka seng HYC bad ïa baroh kiba la btin lynti ïa u, kumjuh ruh ïa ki kmie ki kpa bad ki bahaïing kiba la ai mynsiem bad ban pynshlur ïa u ha kane ka kam ñiah saikil bad ka thong jong u kan ym kut tang hangne hynrei ban ïoh khur sa ïa ka takma ksiar lada dei hapoh ka ri ne shabar ri ruh kumjuh.
