Shillong, Ïaïong 05
Ka OM Roy Memorial Higher Secondary School ka la pynkup burom ïa ki khynnah kiba la wanrah burom da kaba khur takma ha ka 3rd North East Games, 5th Meghalaya Games bad ha ka Khelo India.
Ïa kane la jingpynkup burom la pynlong ha ka sngi pynkut ïa ka Annual Sports Meet 2024 kaba la long ha ka Sngi Thohdieng hapoh kane ka skul kaba don ha Mawlai Kyntonmassar.
Ha kane ka sngi la ïadonlang u Asst Director ka tnat ïalehkai ka sorkar Jylla u Bah Paia War Nongbri kum u kongsan, kumjuh u Asst. Director ka SAI Training Centre Shillong u T.S Chavhan kum u symbud kongsan, u Gunin Changmai (SAI Archery coach), ka Principal Kong A. Syiemlieh, u Rangbah Dong jong ka dong Kyntonmassar Bah A. Biam, ki nonghikai lem bad ki khynnah skul.
Kane ka skul ka la pynkup burom ïa kawei na ki ‘thei ïalehkai Athletics, ka Rukini R.T Dkhar kaba khur ïa ka takma rnong ha ka North East Games kaba dang kut shen mynshem bnai ha Nagaland. Ka OM Roy ka la ïoh ruh ban khur haduh 16 tylli ki takma ba kynthup ïa ki takma ksiar, rupa bad rnong lyngba ki khynnah kane ka skul ha ka 5th Meghalaya Games kaba long ha u Kyllalyngkot ha Tura. Kane ka skul ka la pynkup burom ruh ïa saw ngut ki nongïalehkai kiba la khur takma ha ka Khelo India, kiba kynthup ïa ka Ekyrpang Meka Sohiong bad u Meshwa Ripnar, kiba la khur takma rnong ha ka Boxing, katba u Da-O-Hi Païa Rymbai bad u Mebanlam Lynti Masharing, kiba la ïadon bynta ban khur takma ksiar ha ka jingïalehkai phutbol.
Haba phai sha ka Annual Sports Meet kaba la neh haduh phra sngi lynter, la lah ban pynlong ïa ki jingïalehkai bapher bapher nalor ki jingïakop thoh ese, ïakop kyntip bad kiwei kiwei. Ïa ka nam lahduh ha ka Annual Sports Meet 2024 la rah da ka Blue House.
Haba ai jingkren ha kane ka sngi u Shavhan u la ong ba ki khynnah ki dei ban pynleit jingmut ha ka pule puthi bad ki dei ruh ban ïashim bynta ha ki kam ïalehkai namar ka long ka jingïarap ban plie lad ha ki jingpule jong ki.
Ha kawei pat ka liang u Bah Paia u la pynpaw ka jingsngewkmen halor ka jingpaw ki khynnah kane ka skul ha ki jingïalehkai bapher bapher haduh ba ki la lah ban khur takma ha ka North East Games, Meghalaya Games bad ha ka Khelo India.
“Kane ka skul ka la rah teng ïa ka nam lahduh ha ka Under-17 jong ka International Subroto Mukherjee Football Cup 2013 kaba la long ha ka nongbah Delhi,” u la bynrap.
Namar kata, u la kyntu ïa ki khynnah ba kin long kiba trei shitom ha ki jingpule jong ki nalor ki jingïashim bynta ha ki kam ïalehkai bapher bapher.
Ha kane ka sngi la pynphuh-pynphieng lyngba ki jingïashim bynta ki khynnah na ki jingshad bapher bapher bad ka jingsam khusnam sha baroh ki nongjop ha ki jong ki group.
