Srinagar, ïaïong:
Uwei u lehnoh u la shah siat ïap hadien ba ka kynhun jong ki shipai ka tnat Indian Army ki la pynpulom ïa ka jingrung tuh jong ki bar ri ha ki bynta jong u Line of Control (LoC) ha Uri ha Baramulla distrik ha Jammu & Kashmir hynnin ka sngi, la ïathuh ka tyllong khubor ba la wan na ka tnat shipai.
Ka jingleit thwet bad ka jingleit kerkut ïa katei ka thaiñ ka la ïai bteng hadien ba ka la don ka jingïasiat kaba mar kylliang hapdeng ki shipai bad ki lehnoh, la ïathuh shuh shuh ka tyllong khubor ba la wan na ka tnat shipai ha kaba la bynrap da kaba ong ba uwei u lehnoh u la shah siat ïap. Ka tyllong khubor ka la ïathuh ba ka kynhun jong ki lehnoh kaba la pyrshang ban wan rung sha ki bynta jong ka ri ka la shah pynphai biang hadien ba ka kynhun shipai ka la siat pyrshah ïa ki. Ki la don shuh ki kynhun shipai kiba la leit ai jingïarap na ka bynta ban pynlong ïa ka jingleit thwet lehnoh, la ïathuh ka tyllong khubor.
