Shillong, Ïaïong 05
Hadien ka jingmih khubor bad saphriang ki jingkynnoh ha ki lad sam jingtip ne ‘social media’ bapher bapher halor ka jingkurup pisa ki pulit ka Longding ha Arunachal Pradesh na kawei ka kali ha kaba la kynnoh ba ka dei ka kali kaba bud ïa u Myntri Rangbah ka Meghalaya u Conrad K Sangma, ka National People’s Party (NPP) ha Meghalaya ka la pynshai ba kata ka kali kam dei satia kaba bud lang ïa u Myntri Rangbah bad ïa kane la dep ruh ban batai shai da u Superintendent of Police (SP) ka Longding.
Ha u kyrwoh ha ka Sngi Thohdieng lyngba u nongaiktien ka NPP, u Bah Himalaya Muktan Shangpliang, la ong ba u National President ka NPP u la leit sha Arunachal Pradesh ha Longding district ha ka 4 tarik Ïaïong, 2024 ban ïalap ilekshon na ka bynta ki kyrtong jong ka NPP ha katei ka jylla.
U Bah Shangpliang u la ong ba ka kali kaba kit ïa u National President ka NPP bad ki kali kiba leit lang ki la ïaid lyngba ka jaka pahara katkum ki kyndon kiba buh ha kane ka ilekshon lane ‘code of conduct’ bad ym shym la lap satia kino-kino ki jingbymbiang.
U la ong ruh ba ha ka por ba khmih bniah ïa ki kali ha Kanubari Check Gate da ka kynhun FST, SST bad ki pulit, baroh ki kali kiba dei jong ka seng la dep lut ban talasi thik-pa-thik kynthup ïa ka kali kaba kit ïa u National President, National General Secretary bad ka kynhun kaba leit lang bad u National President sha Longding ha kaba ym shym la lap kano-kano.
U Bah Shangpliang u la ong ba kum ka seng, ym don jingtip eiei shaphang kata ka jingjia tad haduh ban da mih ha ki lad pathai khubor. Kumta une u nongaiktien ka NPP u la ong ba ka seng ka la shah pynngeit tang shiliang ha ki khubor kiba mih, bad kano-kano ka jingthmu ban pynïadei lang ïa katei ka jingjia bad u National President ka NPP ka long ka bym don nongrim bad khlem shongnia satia.
Namar kata, u Bah Shangpliang u la ong kane ka jingpynshai ka dei kaba donkam namar ka jingshah kynnoh kumba la mih khubor bad pynsaphriang ha ‘social media’.
