Blari Dashisha Lyngdoh
U Amolops siju u dei u kynja jakoid ba dang shu shem shen ha Krem Siju ha South Garo Hills District, Meghalaya. ïa u Amolops siju lah shem da ki nongwad bniah na ka Zoological Survey of India (ZSI) kiba kyrteng Bhaskar Saikia bad Bikramjit Sinha kiba dei na ZSI Shillong bad KP Dinesh bad Shabnam Ansari kiba dei na ZSI Pune bad la shem ïa u ha ka por ka expedition jong ka krem siju ha u bnai kyllalyngkot 2020. Ki ai kyrteng ïa u Amolop siju ban ai burom ïa ka jaka ha kaba lah shem ïa u.
Ka jingshem jong une u jakoid ka ai jingmut ha ngi shaphang ka jinglong jong ki jakoid basah hapoh ki krem bad shaphang ka jinglong jingem jong ka krem Siju. Kane ka krem ka jrong kumba 5phut 16 inchi bad la thaw ïa ka da ki mawshun. Kane ka Jinglap ïa u Amolop ka long ka sien kaba ar ha India ban shem ïa u kynja jakoid napoh krem. ïa u Amolop lah ban shem ha baroh ki jaka ka North East India, North India, Nepal, Bhutan, China bad ka Malaya Peninsula.
U Amolops Siju u dei na ka longing cascade jong ki jakoid. Une u jakoid u im ha ki jaka bajylliew bad ba dum jong kane ka krem bad la shem bha ïa kine ki jakoid ha ki kshaid barit .U Amolops u dei u jakoid uba don ka jingheh kaba biang bad ka jingjrong kaba 6 haduh 7 cm. Ka met jong u ka don ki rong jong ka mariang kaba khleh lang naduh rong ktieh haduh rong dpei kaba pynlong ïa u ban pynïasoh lang bad ka jinglong jong ka krem bad u don ka met kaba jlih kaba ïarap ia u ha ka ïaid ka ïeng lyngba ki jaka ba rit. U amolops siju u don ruh ki kjat kiba syndait shilliang (partially webbed feet) kiba ïarap ïa u ban jngi lyngba ki jaka bajylliew jong ka krem. U don ki khmat kiba rit bad u bam ïa ki mrad rit kiba don hapoh jong ka krem kum ki thapbawa, puid, wieh bad kiwei kiwei pat ki khñiang. Ka Amolop kynthei ka kha ïa ki pylleng jong ka ha ki jaka bajylliew jong ka krem. U Amolop ym sah junom hapoh kane ka krem hynrei ynda u lah kham heh u mih noh na kane ka krem bad u sah ha kiwei pat ki jaka U amolops siju u dei u jakoid uba donkam shisha namar u pynroi ïa ka jingdon jingem jong ki mrad ha Meghalaya bad u ïarap ia ka jinglong jingem hapoh jong ka krem siju. Ngi dei ban sumar ïa kum kine ki jakoid namar ki long ki jakoid kiba duna ha ka pyrthei baroh bad na kane ka daw ngi dei ban wad ki lad kumno ngi lah ban pynneh pynsah ïa ki khnang ba ki dang roi ha ka jingdon jong ki.
Author Bio : Ka kyrteng Jong nga la dei Blari Dashisha Lyngdoh bad nga dang pule MSC Jong Zoology ha Assam Don Bosco University.
