Shillong, Ïaïong 05
U President ka Voice of the People Party (VPP), Bah Ardent Basaïawmoit, u la kynnoh ba u Bah Samlin Malngiang MLA barim ka Sohïong konstitwensi bad u paralok jong u, u la ïam bad jaw ummat haba u wan ïakynduh ïa u ha por ba u long kum Chief Executive Member (CEM) ka KHADC namar ka jingsynshar donbor u MLA barim ïa ki shnong ki thaw ha Sohïong konstitwensi.
Ïa kine ki kyntien u la pynpaw ha ka jingïalang ka VPP ha Sohïong ha ka 5 tarik Ïaïong 2024.
“Ngam pat ju ïathuhkhana mynno-mynno, hynrei mynta ngan ïathuh noh ba u myrsiang uba jlaw nguid haba u la nguid ïa u doh shyieng ka la sahkut ha ryndang kat haduh ba u myrsiang u la raikhoh namar bym lah shuh ban sei ïa ka doh shyieng” u la ong.
U la ïathuh biang ban lah sei ïa ka doh shyieng, u myrsiang u la buh ruh da ka bainong ban ai kaba heh lada don kiba lah ban sei ïa ka doh syieng. Hynrei mar shu wan ka thring ka la phrung da ka khlieh ban sei ïa ka doh shyieng bad u la sngew pyngngad. Ynda ka thring ka la pan bainong na u myrsiang u la ong lada un ktha ïa ka khlieh ka la ïap bad mar kumta ka thring ka la phet noh. Bad dei hangne ka jingsneng ka ong, “U Haram u khlemraiñ ïa uba la leh bha ïa u,”
U Bah Ardent u la pynkynmaw haba wan ka ilekshon MDC shiteng samoi, u la ai jingmut ïa u Bah Samlin ba un iehnoh ïa ka kyrdan Maharal jong ka tnad PWD ban ïakhun ïa ka ilekshon namar u don jingkyrmen ban jop beit bad haba la jop la ïakhun ruh ïa ka ilekshon MLA ha u snem 2018. U la ïathuh biang ynda u Bah Samlin u la jop, u Bah Ardent u la rem noh bad u (Bah Samlin) la mareh ban thaw sorkar bad ka BJP khlem da sngap shuh ïa u tang namar ba u la rem ilekshon.
Nalor nangta, u Bah Ardent u la ther tyngeh ïa ka seng UDP bad HSPDP kiba kam ba ki dei ki seng ‘riewlum kiba don ha ka kynhun Regional Democratic Alliance (RDA) hynrei ka jingïakren ïatylli jong ki ka dei tang ka kam thok suda ïa ki paidbah namar haduh mynta ki ar ngut ki MLA ka HSPDP, u Bah Mathodius Dkhar MLA na Mawshynrut bad u MLA ka Mawthadraishan, Bah Shakliar Warjri uba dei Myntri ha ka sorkar jylla kim shym la mih wat tang shisien ban ïalap ilekshon ïa u kyrtong ka RDA, Bah Robertjune Kharjahrin.
Ha kawei ka liang ka ban long shisha ka khubor ka ban pynkyndit ïa baroh ki nongïalam jong ki seng saiñpyrthei bapher-bapher namar ki nongkyrshan ka UDP, NPP, Congress ki la wan sha jingïalang ka VPP ban ïa pyrta lang ha u ‘Prah’ ryngkat u Bah Ardent Basaïawmoit kum President ka VPP bad Dr. Ricky AJ Syngkon kum u kyrtong MP ka VPP ha jingïalang ha ka Sngi Thohdieng ha Sohïong.
La sakhi ruh ba ha kane ka jingïalang ka madan ka la dap smam mar shu phah pyrta ha u prah da u Bah Ardent Basaïawmoit hadien ba la dep ka jingkren. Hadien hangne la ïohi ba ki paidbah ki la tur kham shajan ban pyrta ha ka shap jong u prah.
Kaba kham phylla shuh shuh ba ki paidbah mar shu pynwai ïa ka jingïalang ki phah tem da ka jingrwai Kongdeng Kongnah ha u Prah ban shad lang kynthei bad shynrang.
La sakhi ruh ba ki paidbah kiba la ïeng laiñ ban khublei kti ïa u Bah Ardent Basaïawmoit bad Dr. Ricky AJ Syngkon.
Kumjuh ruh ki nongkitkam ka VPP Sohïong Konstitwensi ki la ai sngewbha da u tynrai dieng soh bad ka ryndia kaba la thoh VPP sha u Bah Ardent Basaïawmoit bad u Dr. Ricky AJ Syngkon u kyrtong MP na VPP shwa ban sdang ka jingïalang VPP ha Sohïong ha katei ka sngi.
