Shillong, Ïaïong 05
U nongaiktien ka Voice of the People Party (VPP), Dr. Batskhem Myrboh ha ka Sngi Thohdieng u la kynthoh ïa Regional Democratic Alliance (RDA) bad buh jingkylli ruh halor ka jinglong ‘riewlum jong kane ka kynhun.
“Haba phi kren shaphang ka RDA, hato ki dei shisha kita ki seng ‘riewlum. Ki kloi ban ïatrei badno-badno bad wat ban pyrshah ïa ki ‘agenda’ ba ïadei bad ki ‘riewlum…te kaei kata ka jinglong ‘riewlum kaba ki, ki don,” la ong u Dr. Myrboh haba kren sha ki lad pathai khubor.
U la ong ruh, “Ki ïatreilang bad ki briew kiba kyrshan ïa ka CAA. Ki ïatreilang bad ki briew kiba pyrshah ïa ka ILP…te kaei kata ka jinglong ‘riewlum ha ki.”
U la ong ruh ba ha ka jingshisha, ym ïahap ban ñiew ïa ka RDA kum ka seng ‘riewlum, wat la u kubur ba ka kynhun ka dei ka seng saiñ pyrthei jong ka Jylla (State Party).
“Hynrei lada phi ong ba ki dei ki seng ‘riewlum, nga sngew ba kane ka ktien ‘riewlum kam ïahap bad ki,” u la ong.
Haba kylli la ka jingmih ka RDA ha kane ka ilekshon kan ktah ne em ïa ka VPP, u nongaiktien u la ong ba ha kane ka kynti, ka jingïakhun kam dei hapdeng ki seng ‘riewlum ne ki bym dei seng ‘riewlum – ka jingïakhun ka dei hapdeng ka synshar-khadar kaba ïaid beit ïaid ryntih, ka synshar-khadar kaba lait na ka bamsap, ka synshar-khadar kaba kitkhlieh bad ka saiñ pyrthei jong ka khwan myntoi shimet, ka saiñ pyrthei jong ka jingbishni bad ka saiñ pyrthei jong ka rhah bor.
Shuh shuh u la bynrap, “Hangne, ngim ïohi ïa ki seng ‘riewlum, ne seng heh ka ri, hynrei ka dei ka thma hapdeng ki ar kynhun – kawei kaba ïakhun na bynta ki mat ba shisha jong ki paidbah bad kawei pat kaba khawpud haduh katta-katta ba kin sa shah weng noh na ka bor ïa kaba ki la muja baroh shi katta.”
