Srinagar, ïaïong:
U Vice President jong ka seng National Conference u Omar Abdullah u la pynbna ba ka seng Congress kan sa ai jingkyrshan ïa ka seng National Conference ha ka ilekshon Lok Sabha 2024.
U la ong, “Ngi la dep ban ïakren bad ai ïa ka rai halor kane baroh. Ha kine ki sngi ban sa wan, hadien ka jingleit sha Delhi, kan sa paw shai bad pyntikna ba ka seng NC bad ka seng Congress kin sa ïakhun lang ha ka ilekshon ha J&K.”
U Omar u la bynrap shuh shuh da kaba ong ba u Farooq Abdullah u dang don mynta ha ka jingïalap ilekshon ha Jammu na ka bynta ki kyrtong jong ka seng Congress.
U Omar Abdullah u la kynthoh jur ïa ka sorkar halor ka jingbym lah jong ka ban pynbiang ïa ki lad jingïada na ka bynta ki kyrtong ban ïakhun ïa ka Lok Sabha ilekshon ha J&K.
U la ong, “Ngi la ïohi ba kim shym la don kino kino ki jingkylla hadien ba la dep ban pynbna ïa ka kyrteng jong u kyrtong jong ngi, kam shym la don kano-kano ka jingpyntreikam shuh shuh ïa ki kynhun pahara ban ai na ka bynta jong u, ne na ka bynta uno uno u nongïalap ilekshon jong ngi. Ha ka jaka ban pynbiang ïa kine baroh, ki bor sorkar ki la leh donbor pynban pyrshah ïa ngi. Kam pher: ha kawei ka liang, ngin ïakhun bad ki seng saiñ pyrthei bad ha kawei pat ka liang ngin ïakhun bad ki bor sorkar ruh.”
