Ranchi, ïaïong:
Ka seng Jharkhand Mukti Morcha (JMM) ha ka sngi Palei ka la pynrung kyrteng ïa u MLA jong ka Shikaripada u Nalin Soren na ka bynta ka Dumka Lok Sabha kongstitwensi, ba un long u kyrtong ban ïakhun ha ka ilekshon, ha kaba kane ka la paw shai ba u Myntri Rangbah barim uba la shah set patok u Hemant Soren un ym ïakhun na kane ka konstitwensi kumba la khmih lynti hashwa.
Ka seng ka la pynïakhun ruh ïa u MLA jong ka Tundi u Mathura Prasad Mahto na Giridih Lok Sabha konstitwensi.
“Ka seng ka la rai ban pynïakhun ïa u Nalin Soren na Dumka konstitwensi bad ïa u Mathura Prasad Mahto na Giridih,” la ong u nongïalam jong ka seng JMM.
Ka seng BJP ka la dep lypa ban pynrung ïa ka kyrteng jong ka Sita Soren, kaba long ka MLA barim jong ka seng JMM bad ka para kynsi jong u Hemant Soren, na Dumka konstitwensi, ba la mang na ka bynta ki Scheduled Tribes.
Kumba la ïoh jingtip, la ong ba ka seng BJP ha ka 12 tarik, Lber ka la pynrung kyrteng biang ïa u MP u Sunil Soren na Dumka konstitwensi hynrei hadien u la weng noh ïa ka jinglong kyrtong jong u khnang ban ailad ïa ka Sita Soren ba kan ïakhun na ka konstitwensi.
U Sunil Soren u la pynrem ïa u President jong ka seng JMM u Shibu Soren ha ka jingïakhun ïa ka ilekshon ha u snem 2019 ha kaba u la tam da kumba 47,590 vote.
Ka Sita Soren, kaba la ïohlong MLA la lai sien bad ka hynmen kynsi jong u nongïalam ka seng JMM u Shibu Soren, ka la leit ban pynïasoh bad ka seng BJP ha u bnai ba la lah.
Ka la pynshisha ba ka la shah ñiewbeiñ ha ka seng JMM bad dei kane ka daw ba ka la phet seng hadien ka jingkhlad noh u kurim jong ka u Durga Soren ha u snem 2009.
Ka seng Congress ha ka 27 tarik, Lber ka la pynbna ïa ki kyrteng jong ki kyrtong ban ïakhun ha ki lai tylli ki Lok Sabha konstitwensi, kiba kynthup ïa ka Lohardaga, Khunti bad Hazaribag.
U Kalicharan Munda, Sukhdeo Bhagat bad u Jai Prakashbhai Patel kin sa ïakhun ïa ka ilekshon ha Khunti (ST), Lohardaga (ST) bad Hazaribagh konstitwensi.
Katkum ka jingïathuh jong ki nongïalam jong ka kynhun synrop INDIA, ha ka por ba ka la don ka jingïakren kaba hashwa halor ka jingïabhah ïa ki konstitwensi ka la dep ban rai ban ïakhun na baroh 14 tylli ki Lok Sabha konstitwensi ha ka jylla.
Kumba la ïohsngew hashwa, la ong ba ka seng Congress kan sa ïakhun na ki 7 tylli ki konstitwensi bad ka seng JMM na ki san tylli.
Ka seng RJD bad CPI (ML) Liberation kin sa pynïakhun ïa ki kyrtong jong ki mar kawei ka konstitwensi, ki la ong.
Ka seng CPI (ML) Liberation ha ka 30 tarik, Lber ka la pynbna ïa lai tylli ki kyrteng jong ki MLA na Bagodar konstitwensi, u Vinod Kumar Singh, un sa ïakhun na ka bynta ka Koderma Lok Sabha konstitwensi ha Jharkhand.
Ka seng BJP ka la pynbna ban pynïakhun na ka bynta 13 tylli ki konstitwensi bad ieh ïa ka Giridih na ka bynta ka seng AJSU.
