Mairang, Ïaïong 07
Kum shi bynta ban bud ryntih ïa ka jingbthah jong ka Election Commission ka Ri India (ECI) ha kaba ïadei bad ka jingkurup ne ka jingpyllait pisa bad kiwei kiwei pat ki tiar ki tar kiba ïadei bad ka ilekshon khnang ban ïoh ïa ka ilekshon Lok Sabha 2024 kaba khuid bad suba, ka District Grievance Committee (DGC) ka la thung ïa ki dkhot nongkitkam jong kane ka komiti na ka bynta ka Eastern West Khasi Hills District, Mairang.
Ha ka kyrwoh khubor ba la phah, la ong ba kine ki nongkitkam jong kane ka komiti ki kynthup ïa u Bah, G. Kharmawphlang, IAS kum u DEO, Kong V. A. Hynñiewta, MCS kum ka Nodal Officer ba peit ïa ka Expenditure Monitoring hapoh u DEO, Bah, S.P. Lyngdoh, MFS kum u Treasury Officer.
Nalor nangta la ong ruh ba kane ka komiti kan sa peit pyrman bad bishar bniah bin-pa-bin katkum ka Standard Operating Procedure, lada don ki jingïoh kurup pisa la ka long da ki bor pulit lane ki SST lane ki FS la ki don jingïadei ne kim don jingïadei bad kino-kino kyrtong ne seng saiñ pyrthei lane ki jingïalap ilekshon bad kiwei kiwei.
