Shillong, Ïaïong 07
Ka 2nd YAI North East Regatta 2024 kaba la pynlong ha Umïam Sailing Club, Orchid Lake Resort, Watersports Complex, ka la kut noh ha ka sngi Saitjaiñ da ka jingpyninam ïa ka rukom ñiah ïa ki lieng.
Ïa kane ka jingïakob la pynlong da ka Umïam Sailing Club (USC) bad ka UDAY for Sailors Foundation ryngkat ka jingïatreilang bad ka Yachting Association of India (YAI), ha kaba ki la don haduh 130 ngut ki nongñiah lieng na kylleng ki bynta jong ka ri India kiba la wan ïashim bynta.
Ki la don 107 ngut ki nongïashimbynta kiba mihkhmat ïa 17 tylli ki klob kiba la ïashimbynta ha ki jingïakob ha ki kyrdan bapher bapher.
Ïa kane ka lympung ïakob la pynhap pyrda da u Director General of Police u Dr. LR Bishnoi kum u Kongsan ha kaba la ïadonlang u Bah Cyril V Diengdoh u CEO jong ka Umïam Sailing Club, u Lt. Col. Alok Yadav, u Bah Robert Lyngdoh, Member Secretary ka USC.
Haba kren ha ka jingïalang u Dr. LR Bishnoi, u la pynpaw ïa ka jingkongsan ban ïoh ïa ka met kaba koit ba khiah krat namar kane kan ïarap ha ban kyntiew ïa ka jinglong ha ka met bad ha ka bor pyrkhat bad dei ban don ïa ka mynsiem pyrkhat kaba bha ha kino-kino ki jingïakhun.
Katba u Bah Cyril V Diengdoh, u la pynshlur ïa ki samla ba kin ïashimbynta ha ka jingñiah ïa ki lieng bad u la ai khublei ïa ki nongpynïaid ïa katei ka lympung ïakob.
Ha kane ka jingïakob, ka NSS Club ka la ïoh bun tam ki takma ksiar, katba ka NBSC bad ka INWTC (M) ki la wan ba-ar ïa kaba bud pat nadien da ka TSA bad EMESA.
