Shillong, Ïaïong 07
U MLA ka seng Congress, u Dr Celestine Lyngdoh, ha ka Sngi U Blei u la kynthoh ïa ka BJP da kaba ong ba ka jingbym pynïakhun kyrtong jong ka, kan pynthikna ba ka Congress kan jop na baroh artylli ki konstitwensi Lok Sabha ha Meghalaya ha ka ilekshon ka ban long ha ka 19 tarik Ïaïong.
“Ka jingbym pynïeng kyrtong ka BJP ha Shillong bad Tura ka ïarap ïa ka Congress. Ki bar jylla ha Meghalaya ki ju peit sha ka Congress lane ka BJP ha ka ilekshon Lok Sabha. Da ka jingbym don ka shap jong ka BJP ha ki kor thep ‘vote’ (EVM), kine kin sa phet noh sha ka Cong-ress. Namarkata, ngi thikna ba ki kyrtong jong ka Congress kin jop,” la ong u Dr Celestine haba ïakren bad ka UNI.
Ka BJP, kaba dei ka seng kaba ïa synrop lang ha ka sorkar Meghalaya Democratic Alliance (MDA), ka la ai jingkyrshan ïa ki kyrtong ka National People’s Party (NPP), ka Agatha Sangma na Tura bad ka Kong Mazel Ampareen Lyngdoh na Shillong Parliamentary konstitwensi.
Lah ban kdew ba ka NPP ka dei ka dkhot jong ka National Democratic Alliance (NDA) bad ka North East Democratic Alliance (NEDA).
Na ka liang ka Congress ka la pynïakhun biang da u MP uba mynta, u Bah Vincent H Pala, na Shillong katba na Tura, ka la pynïaleh da u MLA ka seng na Gambegre, u Saleng A Sangma.
“Ha baroh ki jaka ki briew ki ïakren shaphang ka seng Congress, bad ha ki katto ki jaka, ki ong ba ka jingïakhun ka dei hapdeng ka Congress bad ka VPP (Voice of the People Party) bad ha ki katto katne ki jaka, ki ong ba ka jingïakhun ka long hapdeng ka Congress bad ka NPP. Hynrei ym don ruh ha kano-kano ka jaka kaba kin ong ba ka jingïakhun ka dei hapdeng ka NPP bad ka VPP. Namarkata, ngi sngewskhem ba ngin jop na Shillong bad Tura,” la ong u Dr Celestine uba dei u MLA ka Umsning.
“Nalorkata, ngi sngewthikna na ka daw jong ka jingkren paidbah ba dang shen jong u Myntri Rangbah, u Conrad K Sangma, ba lada ki paidbah ki thep ha ka shap jong ka NPP, ka Kot kan leit sha ka BJP,” u la ong.
Haba pynpaw ïa ka jingsngew skhem ba u Saleng un pynliem ïa ka Agatha, kaba dei ruh ka para khatduh jong u Conrad, u Dr Celestine u la ong, “Ka Congress ka don ka lyer ha Rilum Garo. Ngi ïoh ïa ka jingkyrshan na ki paidbah, bad ki kwah ban don noh da uwei u nongïalam u ban mihkhmat ïa ki ha Lok Sabha.”
“Kiba bun na ki nongshong shnong ha Rilum Garo ki ïakren ba balei yn hap ban ai ‘vote’ beit tang sha kajuh ka longïing longsem mynta la bun snem. Ki briew shathie ki kwah ïa ka jingkylla, bad ki kwah ban ailad noh ïa kiwei, bad namarkata, ki ïohi ba ka don ka lad ïa u Saleng ba un long kum ka sur ka jong ki ha Lok Sabha,” u la bynrap.
Lah ban kdew ba ïa ka Tura Lok Sabha konstitwensi, la mihkhmat da ka longïing longsem jong u Purno Agitok Sangma mynta la 14 sien. Ka Agatha ka la jop ïa ka ilekshon MP banyngkong ha u snem 2008, bad ka la jop biang ha u snem 2009 bad 2019. (UNI)
