Jowai, Ïaïong 07
Ka Shad Sukra ba shisien shisnem jong ka Seiñraij Jowai ba la pynlong da Arts & Culture Committee jong ka Seiñraij Jowai, ha ki ar sngi lynter ka la sdang ha ka Sngi Saitjaiñ da ki jinglehkai ‘drama’ bad pynkut pat ha ka Sngi U Blei halor ka phang “Hawa Tip U Kohngooh Ïa ki Hukum Adong Blai, Wa Man Ka Luti I Suk Ha Pyrthai”.
Ha ka Shad Sukra kaba la long ha Ïawmusiang, la wan sakhi lang da u Justice H.S. Thangkhiew, Judge ka High Court Meghalaya, u President ka Seiñraij Jowai Bah Hercules Toi, u Dolloi Elaka Jowai Bah Puramon Kynjing nalor ki hajar ngut ki khun niamtre ryngkat ki riam ki beit ba iphuh-iphieng.
U Justice H.S. Thangkhiew ha ka jingkren kum u kongsan, u la pynpaw ba u dap da ka jingkmen ban don bynta lang ha kane ka sngi kyrpang jong ki khun ka Niamtre. U la kyntu ïa ki khun ka Seiñraij ban aiti met bad mynsiem, ban kdup ban piam bad sumar ïa ka riti dustur namar kadei ka jinglong kyrpang jong ka ri bad ka jaitbynriew.
Ka jaitbynriew kaba stad ka tei ïa kaba bha bad weng noh ïa ka bym long, la ong u Justice H.S. Thangkhiew.
La pynphuh-pynphieng ïa ka Shad Sukra da ki jingshad ba la shim bynta da 16 tylli ki kynhun kynthup naduh ki samla shynrang bad kynthei kumjuh ki longkmie.
Ki 16 tylli ki kynhun ki kynthup ka KKC Seiñraij Jowai, Niamtre Shillong (Student), Umchangiar, Chilliangraij, Tpep-pale, Dulong, Sein?raij Niamtre Ummulong, Panaliar, Iawmusiang, Karbi Troupe, Guwahati, Loompyrdi Iongpiah, Seng Khasi Mawphlang, Seiñ tyllilang, Loomiongkjam, Sein?raij Shillong bad Loomkyrwiang.
Hashwa kane, ha ka por mynstep ka la don ka jingïalang ha madan Mynkoi Pyrdi Loompydi Iongpiah Jowai ha ka jingdonlang u Vice Chancellor ka NEHU Prof. Prabha Shankar Shukla bad ka Kong Silbi Passah.
La ïoh ka jingkren lamkhmat na u President Seiñraij Jowai Hercules Toi bad la ïoh ka jingkren shaphang ka Shad Sukra na u Bah Arwotki Sumer General Secretary Seiñraij Jowai nalor ki kyntien sneng kyntien kyntu na ki ‘riew rangbah bad ki jingshad na ki dong bapher-bapher.
La pynshongshit shuh shuh ïa ka Shad Sukra da ki jingshad ‘Mih Iaw’ ha kaba baroh ki khun ka Seiñraij Jowai ki la ïa shad kymbrum ryngkat ki sur ki rwai kiba pynsawa ïa ka shnong ka thaw naduh na Mynkoi Pyrdi haduh ban da poi ha Ïawmusiang.
Katba ha ka por mynmiet pat kaba dei ka bynta kaba khatduh jong ka Shad Sukra ka la don biang ka jingshad ‘Kper Syntu’ na ki dong ki shnat ka Jowai kaba la pynlong ha Mynkoi Pyrdi Loompyrdi Iongpiah.
