Aizawl, Ïaïong 07 (UNI)
Ki bor ba dei khmih ha Mizoram ki la ïoh kurup 38.36 kilo u ‘heroin’ bad kumba 134 kilo u ‘Methamphetamine’ hapdeng u Kyllalyngkot bad Lber, la ong ki ophisar ha ka Sngi U Blei.
U IGP (Headquarters) ka tnad pulit Mizoram, u Lalbiakthanga Khiangte u la ong ba ka tnad pulit marwei ka la ïoh kurup 19.79 kilo u ‘heroin’ bad 27.277 kilo u ‘Methamphetamine’ ha katei ka por. Katei ka jingkurup ka kynthup ruh ïa 20 kilo u kynja.
U la ong ba la pynngat mukotduma ïa kumba 92 tylli ki jingjia hapoh ki kyndon jong ka Narcotic Drugs and Psychotropic Substances Act, 1985 bad 120 ngut ki briew ki la shah kem halor ka jingdonkti jong ki ha ki kam khaïi bad ka jingdon ïa ki drok ba be-aiñ bad ki jingdih pynbuaid ha katei ka por. Utei u drok baroh uba la ïoh kurup u shong dor kumba `10.60 klur, u la ong.
Ki ophisar ka tnad Excise bad Narcotics jong ka Jylla ki la kurup 18.57 kilo u ‘heroin’ ha kine ki 3 bnai ba la dep katba ka jingïoh kurup ïa u ‘Methamphetamine’ ka long 106 kilo, la ong u nongaiktien ka tnad, u Peter Zohmingthanga.
Katkum ki jinglum jingtip na ka tnad Excise bad Narcotics, 12 ngut ba kynthup ïa 2 ngut ki kynthei ki la khlad noh namar ka jingkyrni ha ka jingdih drok hapoh ka Jylla ha kine ki 3 bnai ba la dep. Kitei ki jingïap ba don jingïadei bad u drok ki dei namar ka jingkyrni ïa u ‘heroin’ ba la khleh lang bad kiwei-kiwei ki drok.
Ka jingdon jong kito kiba la khlad noh namar ka jingïadei bad u drok ha u snem ba la dep ki long 76 ngut ba kynthup ïa 12 ngut ki kynthei, katba ka jingdon jong baroh kiba ïap namar ka jingkyrni ha ka jingdih drok ha ka Jylla naduh u 1984 – hadien ba la lap ïa ka jingïap banyngkong eh namar u drok ka long 1822 ngut ba kynthup ïa 221 ngut ki kynthei.
