Jowai, ïaïong 07
Ka Lion Sports Youth Affairs ka la bteng ban khur jingjop bad u Deibormi Rangad ruh u la bteng ban khur ïa ka nam ‘Man of the Match’ ha ka jingïalehkai ‘District Cricket League 2024’ ba la pynïaid da ka West Jaiñtia Hills District Cricket Association ha madan Khliehtyrshi Mini Stadium ha ka Sngi Saitjaiñ.
Haba phai sha ka jingïalehkai, ka Lion Sports Youth Affairs ka la pynliem ïa ka Cultural Youth Club Mowkaiaw da 135 run.
Ïa ka jingkynting pisa la jop da ka Lion Sports Youth Affairs bad kam trai shwa ban tied nyngkong da kaba ïoh 206 run na ki 35 over bad hap 7 wiket.
U Deibormi Rangad u la tied 86 run marwei na ki 79 tylli ki bol, u Heiyoomiki Ryngkhlem u la tied 44 run na ki 68 tylli ki bol. Katba na ka liang ka Cultural Youth Club Mowkaiaw, u Grateful Lyngkhoi u la khur 2 wiket na ki 7 over ba u la kawang bad u Regardful Lapasam u la khur 2 wiket na ki 7 over.
Haba wan beh ïa katei ka thong kaba heh, ki nongtied ka Cultural Youth Club Mowkaiaw ki la lah ban tied tang 71 run na ki 14.4 over bad hap lut baroh ki wiket.
U Rangdamon Laloo u la tied 24 run na ki 22 tylli ki bol bad na ka liang ka Lion Sports Youth Affairs, u Wijan Pohleng u la khur 3 wiket na ki 3 tylli ki over kiba u la kawang, u Deibormi Rangad u la khur 2 wiket na ki 2 over, and u Peterson Lamare u la khur 2 wiket na ki 4 over.
