Shillong, Ïaïong 07
Ka Hurdles Cricket Club ka la ïoh ban rah ïa ka nam lahduh ne Champion jong ka lympung 3rd District League T20 Cricket Tournament 2024 ba la pynlong da ka East Khasi Hills Cricket Association ha Smit.
Kane ka jingïoh rah ïa ka nam lahduh ka la wan urlong ha ka sngi Saitjaiñ hadien ba ka Hurdles CC ka la lah ban pynliem noh ïa ka Cricket Lovers Cricket Club ha ka jingïalehkai final kaba itynnad bad ïakhaid bha.
Haba phai sha ka jing-ïalehkai final, ka Hurdles CC kaba la jop ïa ka jingkynting pisa (toss) ka la kam trai ban tied nyngkong bad na ki 20 tylli ki over ka la lah ban kamai tang 131 run bad hap noh 7 wiket. U Pynshaitbor Girodh marwei u la tied 23 run na ki 19 tylli ki bol bad u Mehraj Hussain Sarkar ka Cricket Lovers u la khur 2 wiket bad ai 15 run na ki 4 over.
Wat la kane ka jingkamai run ka Hurdles CC kam shym la dei kaba heh hynrei ki nongkawang bol jong ka, kim shym la duh mynsiem satia bad naduh kaba sdang ki la ïaleh katba lah ban tehlakam ïa ki nongtied ka Cricket Lovers.
Haba beh ïa katei ka thong, ki nongtied ka Cricket Lovers kim shym la lah ban shan ne wad ïa ki run basuk hynrei ki la hap ban trei shitom. Pynban ha kaba kut, ki la lah ban kamai tang 99 run na ki 20 tylli ki over bad hap haduh 8 wiket bad pynlong ban shah rem noh da 32 run.
U Rohit Yadav u la tied marwei 23 run na ki 36 tylli ki bol hynrei kam shym la biang satia ban kot sha katei ka thong. Kane ka wan ruh lyngba ka jinglah kawang bol bha jong u Jonathan Pariong uba la khur haduh 3 wiket bad ai tang 11 run na ki 4 tylli ki over kiba u la kawang.
Wat la u Rohit Yadav um shym la lah ban pynjop ïa la ka kynhun ha ka final, hynrei namar ki jinglah pat jong u ban ïalehkai bha ha man la ki jingïalehkai ha kane ka lympung, ka la pynlong ïa u ban ïoh khur ïa ka khusnam ‘Man of the Tournament’, katba u Jonathan Pariong uba la ïalehkai bha ha ka final, u la khur ïa ka khusnam ‘Man of the Match’.
Ha kane ka sngi pynhap pyrda ïa kane ka lympung, la ïadon lang u Naba Bhattacharjee uba long u Honorary President ka MCA, Bah Gideon Khar-kongor Honorary Secre-tary MCA, Dhruva Tha-kuria Honorary Treasurer MCA, Sordar Shnong, Smit Pyllun, Secretary Shnong Smit Pyllun, ki dkhot na ka Seng Samla Smit Pyllun, Bah Romel Lyngwa bad ki dkhot na ka District Association.
