Shillong, Ïaïong 07
U Myntri ka tnat Jngoh Kai Pyrthei jong ka Sorkar Jylla bad kum Working President ka UDP, Bah Paul Lyngdoh, u la ong ba ka jingïakhih ïa ka jingkyntur pud ka Meghalaya Urban Development Agency (MUDA) sha ki shnong khapsor kiba hap ha ki jaka ka Khyrnit Hynriew ha ki snem ba kham mynshwa ka shu kut noh tang ban leit kawang maw ïa ki pulit haba ki leit tur sha Secretariat.
Haba ai jingkren ha ka jingïalang ka UDP ha Mawlai Nongpdeng ha ka janmiet jong ka Sngi Saitjaiñ ban pan jingkyrshan ïa u Bah Robertjune Kharjahrin kum u kyrtong ka UDP ha kane ka ilekshon MP, u Bah Paul Lyngdoh u la ong kam don jingmut ban jied ïa kita ki nongmihkhmat ban leh ‘drama’ ha Motphran. Kane kan myntoi aïu ïa ki paidbah ban leit ïeng laiñ ban leit thep ‘vote’.
Wat la u Bah Paul Lyngdoh u khlem kdew kyrteng ïa kita kiba ïalam ban tur sha Secretariat khlem da seisoh, hynrei mar shu jop ma u kum u MDC u la bat ïa ka tnat Building Bye-Laws ha KHADC hapoh ka jingïalam u Bah Titosstarwell Chyne kum u CEM ki la leit sha Secretariat ban ïakynduh ïa u Bah Sniawbhalang uba bat ïa ka tnat Pynroi Sor ha kito ki por ban ïakren pynbeit ïa kane ka jingeh jong ki paidbah.
U la pyntip ba ha ka jingïapynbeit, ka sorkar ka la aiti sha ka KHADC ban shimti khnang ba ki shnong kiba hap ha ki jaka ‘schedule area’ ki paidbah kin leit shim jingpynshisha na ka KHADC haba ki kwah ban shna ïing kat haduh ba ka council ka la ïoh lum pisa ar klur tyngka.
“Ngi khlem leit pyrta shnong ne ngi khlem leit shoh leit dat ïa u Myntri ka Sorkar Jylla ha kito ki snem, hynrei ngi ïakren kum ki nongïasaid aiñ” u la ong.
Nalor nangta, u la ïathuh ba u la jop MLA saw sien bad don ha ki saw tylli ki sorkar bad kum u nongïalam u hap ban sngewthuh bha haba wan ki kot ki sla namar lada kim lah ban shim rai ki ophisar kin sa ïalehkai ïa ka lawei jong ka jylla bad dei hangne ban ieid ïa ka jaidbynriew donkam ban pynkhlaiñ haba thoh ïa ki rai lyngba u khulom.
Ha kane ka jingïalang la ïoh jingkren ruh na u kyrtong ka UDP, Bah Robertjune Kharjahrin, Bah Metbah Lyngdoh, Bah Jemino Mawthoh, Bah Panbor Ryntathiang bad Bah PT Sawkmie.
