Shillong, Ïaïong 07
U Chief Executive Member (CEM) ka Khasi Hills Autonomous District Council (KHADC), Bah Pynïaid Sing Syiem, u la ong ba ka jingïakhih jong ka seng Voice of the People Party (VPP) halor ka bhah thung kam thung jam (Reservation Policy) kam shym la ai jingmyntoi ïa ki Khasi hynrei ka ai jingmyntoi ïa ki Garo.
U Bah Pynïaid u la pynpaw ïa kine ki kyntien haba u ai jingkren ha ka jingïalang ïalap ilekshon ka NPP ban pan jingkyrshan ïa ka Kong Ampareen Lyngdoh kaba dei ka kyrtong ha kane ka ilekshon MP Lok Sabha kaba la long ha ka Sngi Saitjaiñ mynshem taïew.
Ha kane ka sngi la ïoh jingkren na ka Kong Ampareen Lyngdoh kaba dei ka kyrtong NPP, ki ar ngut ki Symbud Myntri Rangbah ka Jylla, Bah Prestone Tynsong bad Sniawbhalang Dhar, Bah HM Shangpliang, Bah David Kharsati.
U Bah Pynïaid u la pynpaw biang ba ki nongïalam ka VPP ki la ong ba naduh ba ïakhih ïa ka bhah thung kam ki Garo ki la sngap jar-jar.
“Dei hi ba ki Garo kin sngap jar namar kane ka jingïakhih ka pynduh jingmyntoi ïa ki Khasi namar imat la phah da u Dr. Mukul Sangma” u la ong.
U la pynkynmaw biang ba ha u snem 2015, u Bah Ardent Basaïawmoit uba dei u nongïalam ka VPP ba mynta u la ïalam bakla ïa ki paidbah halor ka MUDA ban leit tur sha Secretariat kat haduh ba u la shah tied lathi ha ki pulit.
U la ong biang kane ka jingïakhih ka shu long kamkai namar ynda la tip ka dei tang ka jingïapynbeit lypa hapdeng u Dr. Mukul bad u Bah Ardent.
Nalor nangta, u Bah Pynïaid u la ong naduh ba ïakhih ka VPP ïa ka bhah thung kam, ki kmie ki kpa ki don jingkyrmen ba ki khun kin ïoh kam sorkar kat haduh ba ki samla kiba donsap ha ka jingïalehkai phutbol, ban rep bad kiwei ki kam ki la ieh lut namar ki kwah ban wad kam sorkar.
U la batai ba ha ka shisnem ki samla ba wad kam ki don 60,000 ngut. Ha ka shisnem ki lait kam sorkar kumba 2,000 tylli bad 58,000 ngut ka sorkar ka hap ban plie da kiwei ki lad ki lynti ba kin seng kam lajong.
“Nga sngewmyllung ban trei bha ïa ka Mawryngkneng konstitwensi namar long lehnohei lut baroh namar tang shu wan ka ‘erïong shimiet-shimiet la shah pynkylla noh ka nongrim, hynrei kane ka ‘erïong ka long kaba ma namar ka wan tang shisien” u la ong.
Shuh shuh u Bah Pynïaid u la ong ba ki nongïalam ka VPP ki ju kynnoh bamsap, hynrei kaba bamsap kaba shyrkhei dei kaba ki pynsngewthuh bakla ïa ki samla.
“Lada ki paidbah kiba ieid ïa u Bah Joy ki dei ban kyntait mardor ïa ka VPP namar kane ka seng ka mut ban pynduh jait ïa ka District Council” u la ong.
Ha kajuh ka por u la ong ba ki nongïalam ka VPP kim don ka burom bad akor namar ki kynthoh wat ïa ki nongïalam niam.
