Shillong, Ïaïong 07
U MLA ka Voice of the People Party (VPP) na North-Shillong konstitwensi, Bah Adelbert Nongrum u la ong ba ka jingpynbna kaba la pynmih na bynta ka jinglait kam ha ka tnat pulit ka long kaba be-aiñ bad mar khongpong ïa ka ‘Office Memorandum’ (OM) jong ka 3 tarik u Rymphang, 2022.
Kane ka jingpynbna na ka tnat pulit ka dei kaba la pynmih ha ka 6 tarik u Lber, 2024 na bynta ka jingthung kam sha ki kam pulit bapher-bapher bad kito kiba don jingthmu ban thep, ki lah ban leh lyngba ka ‘online’ (meghpolice.gov.in) ka ban pdiang naduh ka 1 tarik u Ïaïong, 2024 bad mynta la rah sha ka 8 tarik mynta u bnai.
“Da ka jingsngewkhia mynsiem, nga la buh ka jingpyrkhat ba haei kane ka shong nongrim katkum ka aiñ. Kane ka long kaba be-aiñ lyngba kane ka jingpynbna ïa kaba ka ‘Upper Age Limit’ la buh ïa ka rta tang haduh 21 snem na bynta ki kam ‘Constable’ bad tang 27 snem ka rta na bynta ka kam ‘Sub-Inspector’,” la ong u Bah Nongrum.
Kum ban shu kdew hangne, ki kam baroh kiba lait ki long 2968 tylli.
U MLA u la ïathuh ruh ba u la ïoh ban ïakren bad ka Secretary jong ka Central Recruitment Board, ka Mary G.T. Sangma ban pan jingshai halor kano ka nongrim ba la pynmih ïa katei ka jingpynbna kaba long mar khongpong ïa ka OM jong ka 3 tarik u Rymphang, 2022.
Ha kajuh ka por, haba pynkynmaw ïa ka jingïakhih pyrshah jong u ïa ka Sorkar da kaba ‘boycott’ ïa ka jingrakhe dap 50 snem ka Jylla, u la kdew ba u la rah ïa 5 tylli ki mat ha katei ka por bad kawei na ki, ka Sorkar ka la pyndem bad pynurlong ha ka ban pynjlan ïa ka rta thep kam sa 5 snem – na ka 32 sha ka 37 snem.
“Haba nga la kylli ïa kane, la pynpaw ba ka dei lyngba ka tnat pulit bad kane ka long mar khongpong ïa ka OM jong ka 3 tarik u Rymphang 2022,” la ong u Bah Nongrum.
Halor ka jingai jingmut ka Secretary ban ïakren bad ka Sorkar, u la pynsngew ba ka Sorkar kam don bor bad namarkata ka daw um banse ban kynjoh ktien noh ïa u Secretary ka tnat kam pohïing ka Sorkar Jylla halor katei ka bynta.
“Nga la shu ïakren bad u Secretary ka tnat kam pohïing (lyngba ka phone) ha ka 5 tarik bad nga la buh jingkylli bad la jubab ba la leh ïa kane lyngba ka ‘Revised Uniform Guidelines’,” u la ong.
Ha kawei ka liang, utei u nongmihkhmat u la buh jingkylli ba kumno lah ban pynkheiñ ïa la ki jong ki kyndon kaba lyngba ka OM, la kren shai ba ka jingpynbna ka dei ban wan tang lyngba ka tnat Personnel.
“Nga kylli na une u ophisar, u ong ba ngi dang pynkhreh. Kumno pat phi lah ban pynmih ïa kane ka jingpynbna lada phi dang pynkhreh. Kane ka long kaba be-aiñ. Kane ka paw ba ka Sorkar MDA-II kam dei na bynta ki samla hynrei kaba pyrshah ïa ki samla,” u la ong.
Shuh shuh haba bynrap ba kane ka long ka jingpynduh noh ïa ka hok jong ki samla, u la ong, “Kumta nga la buh ïa ka jingai jingmut ba khlem da pynslem, kine ki heh ophisar ki dei ban mynjur noh mardor lyngba ka ‘Corrigendum’ ban pynbeit ïa ka jingbakla khnang ba ki khun samla kin ym duh ïa la ka jong ka hok.”
