Ki ‘riewtymmen ki ju sneng bad kyntu ïa ki samla shynrang kiba dang khynnah samla ba kim bit ban ïa juh ïa jan than eh bad ki ‘Thei ïap lok ne ki ‘Kha-ïap-saw. Namar ïoh ki shah pynbiej bad ki ngat ha ka shangkhawiah ne ka jingriam jong i.
Namar ki kha-ïap -saw ki long kiba pnah ktien ban khroh ban kjor bad pynbang pynthiang ïa ki samla shynrang kiba dang khie dang san ka rta. Kumta ki ‘riewtymmen ki sneng ki kyntu ïa ki khynnah samla shynrang ba kin kham kiar ban ïajuh ïajan bad ki kha-ïap-saw. Hynrei ka long kaba lyngngoh kim ju sneng ne kyntu eiei ïa ki samla kynthei ba kin kham kiar na ki ‘Rang ïap lok.
Ha ka jingshisha ki ‘Thei ïap lok kim don jingïapher eiei bad ki shynrang kiba la ïap lok. Hynrei ki ‘Rang ïap lok pat ki dang ïoh ka jingshaniah na ki ‘thei samla kiba dang khynnah samla ruh. Hangne ka pyni ba u Rangbah u dei u 12 bor bad ka kynthei ka long tang shi bor. Kumta ka shongkha khynnah kam wanrah ka jingbha ïa ka ïing ka sem bad ïa ka lawei jong ki.
C. B. Iawphniaw
