Shillong, Ïaïong 07
U President ka Voice of the People Party (VPP), Bah Ardent M. Basaïawmoit u la ong ba lada jied ïa ki nongmihkhmat kiba ai pisa ïa u paidbah ban poi sha ka thong, ka nang pynskhem pynban ïa ka pap.
“Ngi sngew ba ngi jied ïa uta u briew ne ka briew kaba ai pisa bad ngin lait na ka pap. Em, ngin ym lait na ka pap, lada ngi jied ïa u briew ne ka briew kiba ai pisa, ngim lait na ka pap, ngi pynskhem ïa ka pap,” la ong u Bah Basaïawmoit haba ai jingkren ha ka jingïalang kaba la long ha ka Sngi Saitjaiñ ha Amla-rem.
Haba buh jingkylli ba ka pap aïu kaba ki paidbah nongjied ki leh haba jied ïa u ne ka briew kiba ai pisa, utei u nongïalam u la ong ba kane ym tang ba ka pynïap ïa ka lawei ki khun ki kti hynrei ka pynduk pynswai ïa ka ri bad ka jaidbynriew.
“Lada phi jied ïa u briew ne ka briew kiba ai pisa, kam dei ka jingjied, ka dei ka jingshah thied…wei ba la shah thied, ngin jemdaw bad jem rngiew shirta ha ka longbriew-manbriew,” u la ong.
U la ong ruh ba kum u nongïalam u long uba eh daw naba um pat ju shah thied haduh mynta.
“Kumta ngi leit sha ki paidbah ban hikai bad ngim kwah ban pynbiej, ne pynthame ïa ki,” u la ong.
Haba ïathuh ba ki don ki briew kiba pynsngew ba u Prah u khlaiñ bha napoh-napoh ha kita-kita ki jaka, u Bah Basaïawmoit u la ong ba ki briew kim nud ban pyni durkhmat naba ki tieng ïoh ïohi u MLA.
“Uei une u MLA ba phin ïa tieng, u dei ma u, u ban tieng ïa u paidbah…uba dei ban ong kumno kata ka lyer jong u paidbah mynta, ki la phai khmat sha ka VPP, bad ‘nga la hap ban pyrkhat ban antad ban kren’, wa ki sdang ban byrthen pynban,” u la ong.
