Shillong, Ïaïong 07
U khlieh nongïalam ka NPP bad Myntri Rangbah ka Jylla, u Conrad K. Sangma u la pynkut noh ïa ka jingïalap ilekshon ba lai sngi jong u ha Arunachal Pradesh ha ka Sngi Saitjaiñ.
Ha kane ka jingïalap ilekshon jong u, u la leit jngoh ïa ka Longding, Leparada, bad Dumpo-rjio ha Arunachal Pradesh. La synran lang ïa u da ka kurim bad ka National Treasurer, Dr. Mehtab Agitok Sangma lem bad u National General Secretary i/c Organization, u James K. Sangma.
Haba ai jingkren ha ki jingïalang ïalap ilekshon, u Sangma u la ong ba ka NPP ka lah ban ïateh lok bad ka kynhun synrop ka NDA, hynrei haba phai sha ka mat jong ki nongshong shnong ka Thaiñ Shatei Lam Mihngi bad ki jaidbynriew trai-ri, ka NPP kan long kaba nyngkong eh ban ïeng na bynta ka hok jong ki paidbah.
“Ngin ïatreilang bad ka NDA; ngi don ka jingïateh lok, hynrei haba ngi hap ban ïakhun na bynta ka dawbah jong ka Thaiñ Shatei Lam Mih-ngi ne Arunachal Pradesh ne Meghalaya ha kano-kano ka por, ngin ïeng na bynta ki briew jong ngi. Nga pyntikna ha phi ba ngin ïeng ban ïakhun na bynta ki briew jong ngi,” u la ong.
“Ka NPP ka ngeit ha ka bha ka miat jong ki briew lajong, bad kano-kano ka rai kaba ngi shim, ngin buh hakhmat eh ïa la ki nongshong shnong bad ka ri,” u la ong, da kaba bynrap, “Ki paidbah ki la ai ka rai ha ngi, bad ngim lah ban pynkheiñ ïa ka jingshaniah jong ki briew jong ngi. Ngin trei da ka jingminot bad ka jingkular ban nang ïai pyntyllun ïa ka bha ka miat jong ki briew jong ngi.”
Haba kren shaphang ka roi ka par bad ka ïoh ka kot jong ka Arunachal Pradesh, u la ong, “Ngi donkam ïa ki briew ba bha ha ka kynhun jong ngi ha ryngkat ka jingshemphang ha ka kam bad ka jingïohi jngai, bad nga kubur ba ka NPP ka don bun ngut ki heh ophisar ba la shongthait kumjuh ki nongtrei Sorkar kiba la pynïasoh bad ngi ban ïateilang kum ka kynhun ban pyntyllun ïa ka roi ka par bad ka jingkiew jong ka thaiñ jong ngi.”
Haba pan ïa ka jingkyrshan na u paidbah na bynta ki 22 ngut ki kyrtong kiba la pynïeng ban ïakhun na bynta ka ilekshon sha ka ïingdorbar thawaiñ ka Arunachal Pradesh, u la ong, “Ngi donkam ïa ki kyrtong kiba biang ban pynsngew ïa ka sur jong ngi, bad ka NPP ka la jied bniah ïa ki kyrtong kiba lah ban mihkhmat shisha ïa ka sur u paidbah ka Arunachal Pradesh.”
Haba kren shaphang ka jingnang kiew ka Meghalaya, u la ong, “Ha ka Jylla jong nga, ngi la sdang ïa ki prokram na bynta ki nongrep, kynthei bad ki samla. Ngi la pynbeit pynryntih ïa ki kam ki ban kyntiew ïa ka imlang-sahlang bad ka ïoh ka kot jong ki briew jong ngi. Ki prokram seng kam lajong jong ngi ki la ïoh khusnam na ka Sorkar India bad ki International Agency na bynta ka ‘Start-Up Ecosystem’ kaba tbit tam. Ngi ngeit ba ki kyrtong jong ngi, ynda ki la shah jied kin sa shim nuksa na ka saiñdur jong ngi bad pynwandur lang kumjuh ha Arunachal Pradesh.”
Haba pynkynmaw ïa ka jingïalang halor ka thong jong u Purno Agitok Sangma (Bam Kwai ha Dwar U Blei) na bynta ka Thaiñ Shatei Lam Mihngi bad ki nongshong shnong jong ka, u la ong, “Ki thong jong u (Purno) ki long kiba suk; u kwah ba ki jaidbynriew bapher-bapher jong ka thaiñ ki dei ban ïa wan lang ban pynsngew ïa ka sur jong ki, kaba sawa jam bad kaba shai ha Delhi. Ki jaidbynriew jong ngi kim don jingïatylli ha ka saiñ pyrthei bad kumta u Purno u la sdang ïa ka NPP, ka ban long ka rynsan tehsong ban pynsngew ïa ka sur jong ki briew jong ngi.”
“Ha ka synshar paidbah, ka jingbun paid ka long kaba donkam, bad lada ngi kwah ba ka Delhi kan shimkhia ïa ngi, ngi hap ban pynkup bor ïa ki seng ba nangne khnang ba kin shimkhia ïa ngi bad ba kin pynleit jingmut ïa ki jingsngewkhia jong ngi,” u la bynrap.
Shuh shuh u la ong ba ha ki por ba la leit, ka Delhi ka ju kyntait ïa ki MP napoh ka Thaiñ Shatei Lam Mihngi lada ki mih shakhmat bad ki jingpynsngew jong ki, hynrei kane ka la sdang ban kylla suki-suki naba ki nongïalam ka thaiñ ki la lah ban ïeng tylli kawei na bynta ka dawbah jong ki paidbah.
