Shillong, Ïaïong 07
Ka jingshit palat ka suiñbneng kaba la sdang ktah ha bun tylli ki jylla ka lah ruh ban ktah ïa ka jingpynlong ilekshon, ha kaba ka Election Commission jong ka India ruh ka dang peitngor bad peit thuh bha ïa ka jinglong-jingman.
Ha ka jingshisha, ïa ka ilekshon sha Ïingdorbar Lok Sabha ha baroh kawei ka ri la ju pynlong beit ha ki bnai lyiur.
Mynta u snem ka tnat kaba peit ïa ka jinglong ka suiñbneng ka Indian Meteorological Department (IMD) ka la ïathuh lypa ba ka jingshit kan kham kiew arshah hapdeng ki 10 bad 20 sngi.
Ka jingshit palat pud ha ki jylla kiba don sha rithor ki la ktah naduh ka jingïalap ilekshon ha kaba ki paidbah kiba wan sha ki jingïalang ruh ki shahktah haba wan sngap ïa ki nongïalap ilekshon bad ka jingshit palat ka suiñbneng kan ktah ruh ha ki sngi thep ‘vote’ haba ki paidbah ki ïeng laiñ ha ki jaka thep ‘vote’.
Haba peit thuh ïa ka jingbatai lypa ka IMD bad ka jingthep ‘vote’ ha ka wat banyngkong bad ka wat ba-ar la ithuh ba kan don ka jingktah.
Ka jingthep ‘vote’ ha ka wat banyngkong kan long ha ka 19 tarik mynta u Ïaïong bad ka ka jingthep ‘vote’ ha ka wat ba-ar kan long ha ka 26 tarik u Ïaïong.
Ki konstitwensi ha kine ki wat jong ka jingthep ‘vote’ ki dei kiba hap ha ki jylla kiba don shaphang shatei ka India, shaphang sepngi bad shapdeng jong ka India ha kaba ka IMD ruh ka batai lypa ba ka jingshit kan poi sha ka 40 Degrees Celsius.
Kane ka jingshit palat ka suiñbneng kan buh jingma ïa ka koit ka khiah jong baroh naduh ki nongïalap ilekshon haduh ki paidbah bad nongtrei jong ki seng saiñ pyrthei bad ki kyrtong kiba ïakhun ïa ka ilekshon.
