Shillong, Ïaïong 07
Ka Election Commission jong ka India (ECI) ka la pynpaw ka jingsngewkhia namar bym da shimkhia than ki nongshong shnong ha ki jaka sor ban leit thep ‘vote’.
Kumta ka ECI ka la shim ki sienjam ban kham pynbha ïa kane da kaba khring lang ïa ki samla ban ïashimbynta ha ka ilekshon. Ka ECI ka la pyllait ruh ïa kawei ka rukom ïalap kaba la tip kum ka ‘Turning 18’ bad ‘You are the One’ da kaba pyndonkam ïa ka lad ai jingtip ‘social media’ ban khring ïa ki samla kiba dang shu ïoh thep ‘vote’ nyngkong khnang ban pynshlur ban ïashimbynta shitrhem ha kane ka tamasa synshar paidbah.
Ka ECI ka la pyndonkam ban ïalap ïariew da kaba pyndonkam ïa ki lad ai jingtip kum ka Facebook, Instagram, X, YouTube da kaba kynthup ruh ïa kiwei pat ki jingpynphriang jingtip kum ka WhatsApp Channel bad LinkedIn. Ka Commission ka la leh ïa kane namar man ka por ka la dep ithuh lypa ba ka jingbym shimkhia ha ki jaka sor bad ka jingbym salia ki samla ka dei kaba sngewkhia bha namar donkam ban kham pynbha ïa ka jingpoi ïashimbynta jong ki nongthep ‘vote’.
Shuh shuh ka ECI lyngba ka ‘Turning 18,’ ka la leh ha kane ka ilekshon sha ka Ïingdorbar Lok Sabha kaba 18 jong ka ri da kaba kham buhthong shwa ïa ki nongthep ‘vote’ kiba dang khie samla kiba thep ‘vote’ ha ka sien banyngkong da ka jingthmu ban pynrung ha ki ïa ka jingsngewthuh bad jingdonkam ba kin ïashimbynta. Da kaba pynrung ha ka jingsngewthuh ïa kiba dang shu kynjoh 18 snem ka rta ïa ka jingkitkhlieh, kan ïarap ruh ban pynkiew ïa ka jingpoi thep ‘vote’ ki nongshong shnong da kaba pyni ïa ka jingbun ki kynthei kiba wan ïashimbynta khamtam ha ka rta hapdeng 18 haduh 30 snem kaba pyni ruh ïa ka jinglong jong ka ri kaba don ïa kata ka jingkynthup lang ïa baroh ha ka synshar paidbah.
