Tehran, Iaïong:
Ka Iran ha kane ka sien ka la kyntu ia ka United States ba kan kiar na ka jingleit tuklar haba iadei bad ka jingiakynad hapdeng jong ka bad ka Israel ha kane ka por bad la ong ba ka Iran ka la thmu ban ther kylliang bad ban kput ia ka jingleit thombor jong ka Israel ha ka jaka treikam jong ka tnat jong ka hapoh Syria. Katba na ka liang ka Hezbollah pat kaba don ha Middle East, ka la maham ia katei ka ri ki nong Jiw ba kan pynkhreh lypa ia ka thma bad ka kynhun lehnoh.
Ha ka jingthoh ba la phah sha ka US ha katei ka sngi da u Deputy Chief jong u President ka Iran- u Mohammad Jamshidi, ka Iran ka la maham tyngeh ia ka United States ba ka dei ban kiar na kaba leit iajan ne iasnoh kti lang bad ka Israel lada ka kwah ban lait ialade na ki jingeh bad ki jingma kiba lah ban wan jia hadien- habud.
Kumjuh na ka liang ka US ruh, ka la maham ia ka Iran ba kam dei ban pynthut ne thombor pat ia ki jaka treikam jong ki shipai ka America kiba don ha katei ka ri. Hynrei, la ong ba ka US pat kam shym la pynphai ktien ne kren eiei haba iadei bad katei ka khubor ba la phah da ka Iran ha kane ka kynti.
Namar la ong ba ka Islamic Republic ka la pynbna lypa ba kan kput ia ka Israel, kaba long ka nongshun jong ka bad haba iadei bad katei ka jingleit thombor jong ki shipai ka Israel ia ka jaka treikam ka tnat jong ka Iran kaba don hapoh Syria ha kane ka taiew ba la leit.
Namar la ong ba katei ka jingleit ther bom jong ki liengsuiñ thma ka Israel ha Damascus, ka la shim ia ka jingim jong 7 ngut ki nong Iran kiba dei ki nongtrei jong katei ka tnat kaba peit ia ki nong Iran ha Syria.
La ong ruh ba ka Israel mynta la katto-katne bnai ka la leit thombor khah-khah ia ki jaka treikam bad ki tnat jong ka Iran kiba don ha kylleng jong ka Syria. Hynrei ka long ka sien ba nyngkong pat ba ka Israel kan thombor mar-khmat kumba ka la leh mynta ia katei ka jaka treikam jong ka tnat na Iran kaba don ha Syria.
