Washington, Iaïong:
Ka US CDC ha kane ka kynti ka la maham sha baroh ki doktor shimet bad ka tnat ka koit ka khiah halor ka jingma jong ka jinglah ban saphriang bad jur ka khlam ki sim ‘Avian Influenza’ lane ka ‘Bird Flu’ kaba ju tip paidbah, ha kaba u don uwei uba la ioh kem ia katei ka jingpang hadien ka jingleit sha ki jaka ri mrad bad jaka ri jingri kiba katei ka jingpang ka la pur bad saphriang.
La ong ba utei u nongri jingri na ka nongbah Texas u la ioh kem ia katei ka jingpang ha ka 1 tarik u Iaiong, kaba long ruh ka sien kaba ar ban lap ia utei u khñiang jingpang ‘H5N1’ ba un pur ha ki briew, ia kaba la ju tip paidbah kum ka khlam ki jait sim lane ‘Bird Flu’.
La ong ba katei ka tnat ka la bud dien ia ka jingjia ha Colorado ha u snem 2022, ha kaba katei ka jingpang ka la pur na ki jait sim sha ki mrad kum ki masi bad kumta ter-ter.
