Dang shen ha ka 5 tarik Ïaïong, ka Voice of the People Party (VPP) ka la pyllait paidbah ïa ka Mang Treikam lane ka ‘Manifesto’ jong ka seng na bynta ka ilekshon ban wan sha ka Lok Sabha. Kane ka Mang Treikam ka long kaba donkam na ka bynta ki paidbah ba kin pule sani bad pynshong nongrim. Bad ym tang jong ka VPP, hynrei ki dei ban pule lang jong kiwei ruh ki seng saiñpyrthei kiba ïakhun ha kane ka ilekshon MP khnang ba kin kham lah ban pynshong nongrim hashwa ban shim ïa ka rai ïano kin kyrshan bad ïano kin kyntait ban phah sha ka Dorbar Bah Lok Sabha kaba don haduh 543 ngut ki dkhot na kylleng ka Ri India.
Ka VPP ka la pynpaw ba lada ka poi sha ka thong jong ka jingjop, ki mat kiba ka seng kan rah bad pynsngew kin kynthup ïa ka jingmanbha ha ka synshar-khadar, ka synshar paidbah, ka jinglaitluid ban mane Blei, ka jinglah ban ïa im lang hapdeng ki jaidbynriew bapher-bapher, ka pule-puthi nalor kiwei-kiwei. Nalorkata, kan rah ruh ïa ka mat halor ka Article 371 bad ka Khyrnit ba 6, ka mat treikam ha ki khappud, tnad pynmih bording, ka rep ka riang, ka mariang, bad ka jingïakajia pud bad ka Assam, ka bhah thung kam ha ki ophis treikam ka Sorkar Pdeng bad kan kyrpad ïa ka jingtuklar ka Sorkar Pdeng halor ka jingkynrei u drok. Ha kajuh ka por, ka VPP kan ïai ban ruh halor ka jingpynrung ïa ka ktien Khasi ha ka Khyrnit ba 8, ka ILP, ka jingpynbha ïa ka tnad ka koit ka khiah, ka jingpynbna ïa ki surok bad ki lad pynïasoh lyngba ki kor teknoliji. Hynrei ka VPP ka la pynbna ba kan ïeng pyrshah ïa ka jingpyntreikam ïa ka CAA, ka UCC ba la wanrah da ka Sorkar BJP, ban pyrshah ïa ka jingtih ‘Uranium’ hapoh ka Jylla bad ka jingpyrshah ïa ka jingwanrah lynti rel khamtam ha Ri-lum Khasi-Jaiñtia.
Nalor kitei ki mat ba la kdew, ka VPP ka la buh ruh sa kiwei pat ki mat ba kan rah sha Lok Sabha lada u kyrtong jong ka, un jop ha kane ka ilekshon. Na ka liang ka seng Congress pat ka la pynbna ba kan pynlong ïa ka khanasamari halor ka ïoh ka kot bad ki kynhun jaitbynriew ha ka ri, ka jingpynkylla bad kyntiew ïa ka bhah sha ka 50% na ka bynta ki SC, ST bad OBC, ka jingmang ba 10% ha ka jingai kam bad ha ki jaka pule ïa kiba duna ka ïoh ka kot na bynta baroh ki jaitbynriew, jingpyntreikam ïa ka skhim ban ïarap 1 lak shisnem ïa ki longïing baduk ha ka ri, jingmynjur ïa ka ‘Right to Apprenticeship Act’ ban ailad ïa ki samla kiba la pyndep diploma lane graduate kiba dang hapoh 25 snem ka rta, jingmynjur da ka aiñ ban kyrshan ïa ki nongrep (Minimum Support Prices (MSP), jingpynduh ïa ka skhim rungkam shipai (Agnipath), jingpynthikna ba bai bylla kaba duna eh ha ka ri kan long 400 tyngka shisngi, jingpynduh ïa ki kam ba shu thung shipor (Contractual) hapoh ka Sorkar bad ki kompani ka Sorkar, jing pyndap jan 30 lak tylli ki kam ba sah thylli hapoh ki tnat ka Sorkar Pdeng nalor kiwei pat.
Na ka liang jong kiwei pat ki seng saiñpyrthei ha jylla bad nabar kim pat pyllait ïa ki Mang Treikam jong ki bad kin sa leh ïa kane ha ki khyndiat sngi ban wan. Tangba ngi dei ruh ban pynkynmaw ïa baroh ki seng saiñpyrthei ba kin pyntreikam ïa ki Mang Treikam jong ki ynda ki wan ha ka bor lane lada kim wan ha ka bor ruh, kin ïakhun bad ka sorkar ban pynlong kam ïa ki jingdonkam bakongsan jong ki paidbah lym kumta ka shu long lehnohei ban pynmih ïa kine ki kot ki sla bakongsan.
Kum ban pynkynmaw, na Shillong Lok Sabha konstitwensi, ki don hynriew ngut ki kyrtong kiba la thep kyrteng kiba kynthup ai u MP bad mynta uba dei u kyrtong ka Indian National Congress (INC), u Bah Vincent H Pala, u Bah Robertjune Kharjahrin uba dei u kyrtong ka United Democratic Party (UDP) bad Hill State People’s Democratic Party (HSPDP), ka Kong Ampareen Lyngdoh kaba dei ka kyrtong ka National People’s Party (NPP), u Dr Ricky AJ Syngkon u kyrtong ka Voice of the People Party (VPP), nalor ki kyrtong shimet kiba kynthup ïa u Prof Lakhon Kma bad u Bah Peter Shallam. Na Tura Lok Sabha konstitwensi, ki saw ngut ki kyrtong ki kynthup ïa ka MP ba mynta ka Agatha K Sangma kaba dei ka kyrtong National People’s Party (NPP), u Saleng A Sangma, u kyrtong ka Indian National Congress (INC), u Zenith Sangma u kyrtong ka Trinamool Congress (TMC) nalor u Labenn Ch Marak kum u kyrtong shimet. Nalor ka jingpeit ïa ki nongïakhun bad ki seng saiñpyrthei, dei ban khmih bniah ruh ïa ki Mang Treikam khnang ban kham pynjanai ïa ka jingsngewthuh shwa ban jied ïano-ïano
