New Delhi, ïaïong:
Ka tnat ïada ri, ka la nang pynjur ha ka ban pynkhlaiñ ïa ki bor pahara ha ki bynta khappud khamtam ban ïaleh pyrshah ïa ki kam thombor jong ki lehnoh bar ri.
Kane ka jingpyntreikam ka la nang ïai bteng khamtam kum ha kine ki por ba mih ki khubor byrngem bad ka jingthmu thombor jong ki lehnoh ha ki bynta jong ka ri.
Kumba la mih khubor ha kine ki khyndiat sngi, la ong ba ki shipai ïada ri ki la sngewthuh ba ki jingthmu thombor jong ki lehnoh hapoh ka ri ka dang ïai bteng naba la sakhi na ka jingshahkem jong lai ngut ki dkhot jong ki lehnoh ha kaba ar ngut napdeng kitei ki dei na Pakistan.
Shi bynta ka jingdon jong ka kynhun shipai ïada khappud kaba treikam ha ki bynta khappud India-Pakistan ka la buh jingshngaiñ ïa ka ri khamtam ha kine ki por ba jur ki jingbyrngem ba nabar ri ha kaba ïadei bad ka jingthombor ïa ka ri.
Kine ki shipai ïada khappud ki la don mynta hapdeng ka jingpynkhreh ban ïaleh pyrshah ïa ki nongshun hadien ba ki la ïoh jingtip na ki kynhun wadbniah ba ka Pakistan ka la sdang ban pynrung tuh ïa ki lehnoh sha ki bynta jong kane ka ri khamtam haba don ki briew kiba napoh kane ka ri ban ai jingïarap bad jingkyrshan ïa ki lehnoh bar ri.
Ki heh jong ka kynhun Intelligence Bureau ha ka jingphah jingtip jong ki sha ki nongthoh khubor ka la ong ba hadien ki jingjia shah pynïap jong ki ‘riew paidbah ha Jammu & Kashmir, ha ki snem ba la leit ka kynhun syntiat ka la hukum ïa ki lehnoh jong ka kynhun Lashkar-e-Tayiba bad Jaish-e-Mohammad ba kin sdang ban rungtuh noh sha ki bynta jong ka ri India halor ka jingthmu ban thom pyrshah ïa ka kynhun jong ki shipai ïada ri.
Uwei na ki heh ka kynhun wadbniah, u la ong ba ka kynhun syntiat ka la khmih bniah kumno ban ïoh ban pynrungtuh ïa ki lehnoh sha ki bynta jong kane ka ri ha ka ban thombor pyrshah ïa ki shipai ïada ri bad shuh shuh ban rung ha ki bynta kiba hap hapoh J&K hadien ka jingjia jong ka jingshah pynïap jong ki riewpaidbah.
Kine ki jingjia jong ka jingshah pynïap jong ki ‘riewpaidbah ka long halor ka jingthmu ban leh pyrshah ïa ki shipai ïada ri bad ban pynbun ïa ki ba kin shah pyntreikam hapoh ka thaiñ.
Kine ki kam pyntriem jong ki lehnoh, ki don jingthmu ruh na ka bynta ban pyntieng pynsyier ïa ki briew ki bym dei ki trai shnong jong ka Jammu & Kashmir, la ïathuh u heh ka kynhun wadbniah.
Ki shipai ïada ri ki la pynkhreh halor kiba bun ki bynta bad ki la ïaleh katba lah ban khanglad bad pynpulom ïa ka jingthmu jong ki lehnoh. Ki shipai ki la pynkhlaiñ ïa ka jingpahara ha ki jaka rung bad ki jaka mih jong ka thaiñ.
Ki shipai BSF bad ki pulit ka CRPF ki la pynjur ïa ka jingpahara ha katei ka thaiñ bad ban khanglad ïa ka jingthmu jong ki nongsyntiat ban pynjur ïa ki kam pyntriem ha ka ri.
