Milan, Iaïong:
Ki pulit ka Italy ha ka Sngi Palei ki la ioh kem ia 22 ngut ki briew kiba don kti ha ki kam thok pisa bad kiba leh thok pisa ne bamsap naduh ki por jong ka khlam Covid-19. Halor kane ka bynta ki pulit ki la ioh kurup ruh ia baroh ki jingdon-jing-em kiba kynthup naduh ki iing paki-dulan ba rem dor jong kitei ki briew haduh ki kali bad ki jingdeng jingkup kiba rem dor kumba 600 Million Euros ($652 Million). Kane ka long katkum ka jingshem jong ki pulit hadien ba la tohkit bniah ia kitei 22 ngut haba iadei bad ka mat ba la wanrah da ka European Union bad ki tnat sam skhim jong ka Italy haba iadei bad ka jingpyndonkam ia ki pisa skhim ba la sam ha ki por jong ka khlam Covid-19.
La ong ba ki pulit ka Venice ki iathuh ba katei ka kynhun jong ki 22 ngut, ka dei kaba ju treikam ha kylleng ki bynta jong ki ri ka dew bah Europe bad kiba la leh thok ia ka pisa ai jingiarap jong ki sorkar bad ki bor pyniaid ha ka por jong ka khlam Covid-19 da kaba pyndonkam ban thied ia kitei ki jingdon-jingem bad ban tei ne thied ia ki iing paki-dulan kiba rem dor.
Ki pulit ki la iathuh ruh ba nalor jong kitei ki iing mala bad ki iing kiba heh, la ioh kurup ia ki jingdeng kum ki baje ksiar, ka ksiar lyngkhot, ki kali ba rem dor kum ka Lamborgini bad ka Porsche, kynthup ruh ia ka pisa kaba palat 600 Million Euros kaba la pynjah na kitei ki skhim iarap pisa jong ka sorkar ha ki por jong ka khlam.
Ki pulit ki la iathuh ruh ba ia kitei 3 ngut la ioh kem na Slovakia, 2 ngut na Austria bad 17 ngut pat la ioh kem na kylleng ki bynta jong ka Italy. Katba, ki pulit ki dang wad bniah bad buddien shuh shuh sa ia kito kiba lah ban don hapoh Romania bad kiba ïadon kti lang ha katei ka kam leh thok pisa jong katei ka kynhun.
La ong ba katei ka jingwad bniah jong ki kynhun wad bniah ka Italy ha kane ka por, kin pynpaw pyrthei lut ia ka jingbamsap bad jing- pyndonkam be-aiñ ia ka pisa iarap jong ka Recovery & Resilience Facility (RRF) da kitei ki heh kiba ju pyniaid ia kitei ki pisa skhim ha kiba bun rukom.
Namar la ong ba ka Italy ka la ioh pdiang haduh 102 Billion Euros na ka EU Covid Recovery Funds, ha kaba 90 Billion ka dei kaba dang pynap ban sa ioh nangne sha khmat hapoh jong u snem 2026.
Hynrei la ong ba ka sorkar Italy ka ju pynlut da ki billion na ka bynta ki skhim tei iing hapoh ka ri, kynthup ia kawei ka jingtyrwa ban siew haduh 110% sha ki trai iing na ka bynta ka jinglut jong ki haba iadei bad ka bording bad kiwei.
