Guwahati, ïaïong:
U nongïalam jong ka seng Congress u Gaurav Gogoi na ka jingsakhi jong u ban ïohi ïa ka jingkyrshan jong ki nongbud jong u, u la sngewskhem ha kaba u la ong ba un sa ïoh ïa ka jingjop ha ka jingïakhun ïa ka ilekshon Lok Sabha na Jorhat konstitwensi ha Assam, ha kaba la ong ba u MP jong ka seng BJP u Topon Kumar Gogoi un sa shah rem lada don ka jingkylla ha ka vote.
Kum u nongmihkhmat jong ka Kaliabor konstitwensi ha Assam, u Gogoi mynta un sa ïakhun na Jorhat, ha kaba u la don bynta ha ka jingleit ïalap ilekshon ha ka sngi kaba ar ha ki bynta jong ka Majuli, ha kaba u la ai jingkren ha ki 12 tylli ki jingïalang paidbah. Wat lada ka Jorhat ka la leit sha ka seng BJP ha kine ki snem ba dang shen, khamtam ha ka por ba bat jingsynshar u kpa jong u Gaurav, uba long u Myntri Rangbah jong ka Assam uba la khlad noh u Tarun Gogoi, u nongïalam jong ka seng Congress u la don jingthmu na ka bynta ban pynkhlaiñ ïa ka jingïadei bad ki nongthep vote, khamtam ki samla.
Ha ka por jong ka jingïalap ilekshon jong u, u Gogoi u la shah pdiang burom da ka jingtied da ki bom Bihu bad ki nongbud jong u ki la kawang syntiew bad pyndeng syntiew ha ryndang jong u. U Gogoi u la ong ba kane ka jingnoh mynsiem jong ki nongbud jong u, ka la pyntikna ba un sa jop ha ka jingïakhun ilekshon bad ba un sa ïoh ka jingkyrshan lyngba ki vote.
U Gogoi ha ka jingleit ïalap ilekshon u la leit ïalap ruh haman ki thliew ïing ha ryngkat ka jingdonlang ki kynhun jong ki riewsaiñ pyrthei bad ki kynhun jong ki riewpaidbah ha Jorhat shwa ba un pynkut noh ïa ka jing-leit ïalap ilekshon jong u da ka jingïalang bad ka jingïabam ja miet bad ki nongthoh khubor.
Ka Jorhat, kan sa pynlong ïa ka jingthep vote ha ka bynta kaba nyngkong ha ka 19 tarik, Ïaïong, ha ryngkat saw tylli ki konstitwensi kiba don ha ki bynta ba shaphang Mihngi jong ka Assam.
