Shillong, Ïaïong 07
Ka East Khasi Hills District Athletics Association (EKHDAA) ryngkat ka jingïatreilang bad ka shlem treikam District Sports Officer (DSO) kan sa pynlong ïa ka lympung ïalehkai jong ki khynnah skul ba la tip kum ka District Level Inter-School Athletics Meet 2024 ka ban sdang naduh ka 24 tarik haduh ka 26 tarik mynta u bnai.
Ïa kane ka lympung ïalehkai kaba 3 sngi yn pynlong ha SAI Centre kaba don ha NEHU Campus, Mawlai Umshing. Kane ka lympung kan long na ka bynta ki shynrang bad kynthei ka ban phiah ha 3 tylli ki kyrdan, kata ka U-14, U-16 bad ka U-18.
Ïa ki phom na ka bynta ban ïashim bynta ha kane ka lympung ryngkat bad ki dur passport size dei ban phah bad pynpoi lyngba ka mobile phone ha u number 8974000664 bad ka tarik ba khatduh ban pdiang ne pynpoi ïa ki phom kan long ha ka 16 tarik mynta u bnai.
Ki nongïashim bynta ha kane ka lympung ki lah ban jied ïa ki jingïakob mareh bapher bapher ba kynthup ïa ka 60m, 100m, 200m, 300m, 400m bad ka 600m. Yn shah ïa ki nongïalehkai ban ïashim bynta tang ha ki kyrdan ba ïahap bad ka rta ka jong ki. Nalor kane, kan don ruh ka jingïakob mareh ‘medley relay’, ba kynthup ïa ka 1000m ka ban phiah hapdeng saw ngut ki nongmareh.
Baroh ki nongïalehkai ki hap ban leit leh ïa ka ‘age screening test’ ne ka jingpynshisha ïa ka rta ka ban long ha ka 22 tarik mynta u bnai ha Mawlai Mawroh Indoor Community Hall naduh ka por 10 baje mynstep bad ha kane ka ‘screening test’ hap ban wanrah ïa ka syrnod Sngi Kha, (Original Birth Certificates).
Kino kino kiba kwah ban ïoh jingtip kaba kham bniah halor kane, ki lah ban phone ïa u Bah K Marbaniang ha une number 8575262689 tang ha ki por long trei.
