Nongstoiñ, Ïaïong 08
Ka ïingbishar Special Judge (POCSO) Nongstoiñ ha ka 19 tarik u Lber 2024 ka la rai pynrem ïa u Welcome Thongni, da kaba pynshitom da kaba tyngeh ban set ha patok haduh 20 snem ha ryngkat ka kuna ba un hap siew haduh T. 30,000 na ka bynta ki kam runar kiba katkum ka kyndon 6 jong ka POCSO Act bad lada um lah ban siew ïa katei ka kuna un hap ban bteng shong patok sa 3 bnai.
Ha ka kyrwoh khubor ba la phah ha ka Lah Sngi U Blei jong ka taïew, la pynpaw ba kane ka rai ka la mih hadien ba ka ïingbishar ka la lap lyngba ki sabut bad ki sakhi-satar kiba biang ban pynshisha ba u Welcome Thongni u dei uba la donkti ban thombor ïa ka longrynïeng jong kawei ka heprit kaba dang lung ka rta.
Katei la jia ha u snem 2019 ha kaba ki pulit ki la ïohpdiang ïa ka jingujor na ki bahaïing jong katei ka heprit ha ka 17 tarik u Nohprah 2019, da kaba la kynnoh ba u Welcome Thongni u la pyrshang ban thombor ïa ka longrynïeng jong ka heprit ha kaba ki pulit ka Nongstoiñ ki la pynrung ïa ka mukotduma katkum ka Case No. 97(12)2019 U/S 9(m)(n)/10 POCSO Act bad la tohkit ïa katei ka kam da ka WPSI DP Nongbri na ka Women Police Station Nongstoiñ.
Na ka liang jong ki pulit ki la ïoh ruh ban kem ïa utei u briew ha kajuh ka sngi ba la ujor kata ha ka 17 tarik u Nohprah 2019 bad ki la rah noh sha ïingbishar ha katei ka sngi, bad ïa ka mukotduma la ‘chargesheet’ da ka ophisar kaba tohkit ïa katei ka kam hapoh ki kyndon 5(n)/6 POCSO Act.
Ha kawei pat ka khubor, ki pulit ka thanat Nongstoiñ ha ka 31 tarik Jymmang 2023, ki la ïohpdiang ïa ka jingujor ba kawei ka heprit kaba dang lung ka rta ka la shah thombor ïa ka longrynïeng ha uwei u briew uba la tip kyrteng kum u Mebanrilang Syiem Shangoi, 22 snem bad la ong ruh ba katei ka la jia bun bun sien kata naduh u snem 2022.
Ki pulit hadien ba la ïohpdiang ïa ka jingujor, ki la pynrung ïa ka mukotduma ha thanat Nongstoiñ katkum ka Case No. 34(05)2023 U/S 5(1)(m)/6 POCSO Act, ïa kaba la shimti ban tohkit da u SI K Mawlong. Ha katei ka sngi ki pulit ki la ïoh ban kem noh ïa utei uba la shah kynnoh donkti ban thombor ïa ka heprit bad ïa ka mukotduma la ‘chargesheet’ da u ophisar ba tohkit ïa katei ka kam ha ka kyndon 5(1)(m)/6 jong ka POCSO Act.
Ka ïingbishar Special Judge (POCSO), Nongstoiñ ha ka 19 tarik u Lber 2024 hadien ba la lap lyngba ki sakhi-satar bad ki sabut kiba biang ka la lap ba utei u briew u dei uba la donkti ban leh ïa katei ka kam runar bad rai pynrem ruh ïa u Mebanrilang Syiem Shangoi da kaba pynsaja tyngeh da kaba phah set patok haduh 20 snem ryngkat ka kuna T. 50,000 halor ka kyndon 6 jong ka POCSO Act bad lada um lah ban siew ïa katei ka kuna un hap ban bteng shong patok biang sa 3 bnai.
