Shillong, Ïaïong 08
Ka KSU Mawlai Circle ha ka Lah Sngi U Blei hadien ba ka la ïoh jingtip ba tikna halor ka jingdon jong ki bar-jylla ha ki thaiñ Mawlai, ka la pynap shrip bad ka la ïoh ban bat ïa kawei ka bos kaba kit da ki phew ngut ki bar-jylla kiba dang wan trei bylla na ki thaiñ Pynursla.
Kitei ki briew ki dang thmu ban leit trei bylla sa sha ki bynta bapher-bapher jong ka nongbah Shillong ba kynthup ïa ka Mawlai.
“Hadien ka jingtohkit la lap ba baroh kine ki mynder ki dei ki bym don kot don sla kiba biang khamtam kaba donkam eh ïa ka ‘Work Permit’ kaba ki dei ban ïoh. Na ka liang ka seng ka la beh krad lut ïa baroh, ba ki dei ban leit phai lut sha Assam, ka jaka kaba ki wan,” la ong ka kyrwoh na ka seng.
Ka seng ka maham ba kan ïai bteng ban beh krad ïa kum kitei ki bar-jylla ba shu wan kamai khlem ki kot ki sla ki ban teh lakam ïa ka jingrung jingmih jong ki bad kiba pynkheiñ tyngkreiñ ïa ka aiñ.
