Shillong, Ïaïong 08
Katba u dang ai jingkren na ka rynsan ïalap ilekshon na ka bynta ka Kong Ampareen Lyngdoh ha ïew Umsning, u Bah Pynïaid Sing Syiem, CEM ka KHADC u la pyrta bad bthah ïa ki bor ka aiñ ban kem ïa ki nongwan pynkulmar ïa ka jingïalang ka NPP.
Ïa kane la lah ban ïohi ruh lyngba ka dur-khih ha ka ‘Youtube’ channel jong ka Batesi TV ha kaba u Bah Pynïaid katba u dang kren, u la ong ki don ki kynhun ba la phah da ka VPP ban pynkulmar ïa ka jingïalang, ym tang kaba la jia mynta, hynrei ha kine ki sngi ba la dep ruh ka la jia kumne bad u la kyntu ïa ki pulit bad ki briew na ka tnat Ilekshon ba kin leh ïa kaba donkam bad ban kem ïa ki nongpynkulmar.
U Bah Pynïaid u la ong, “Ka NPP ka burom ïa kiwei ki seng saiñ pyrthei ha ka por ba ki pynlong jingïalang. Balei ym burom lang ïa ngi? Balei phi pyni ïa ka jinglong poh ka jong phi kum ka VPP ban pynkulmar kumne? Nga, nga ong ba kine ki dei tang ki briew ba la rung u ‘Virus’ ne khñiang ha jabieng ki jong ki bad nga ong ruh ba une u ‘Virus’ u wan na West Bengal.”
U CEM u la ong, “Kum ïa kine ki briew ba thmu pharia ïa ka jaidbynriew, lada kim nang ban ïakren hapoh ïingdorbar balei kin wan pynthut hangne, ka bym lah ban long kane, lada phi phim sngew ïahap ban jied ïa ngi, wat nym jied ngim pynbor ïa phi, hynrei ngi kwah tang ïa kito ki briew kiba sngewthuh ïa ka ïap ka im ki paidbah.”
“Ha Mawryngkneng naduh ba jop u Prah, ha kine ki shi snem, ki paidbah ki la ong ba ym ïoh kam pynroi eiei, ki ong ba ki la babe. Ha jaka ban wanrah ïa ki skhim thymmai pynban ki khang,” la ong u Bah Pynïaid bad bynrap ba kim don por ban wanrah jingbha hynrei tang ban pynkulmar ïa u paidbah.
U Bah Pynïaid u la ong, “Ka jingïakhih ïa ka Reservation Policy da u Bah Ardent, ko ki samla wat shah pynbiej ka dei ka jingïakhih tang ban pynduhnong ïa ngi u Khasi, mynta hangno ïoh kam sorkar u Khasi, naduh ba ïakhih u Bah Ardent la mih ki kyndon aiñ kiba eh, bad imat ïa kane ka jingïakhih la phah da u Dr Mukul.”
U CEM ka KHADC u la ong, ym dei tang ka VPP ba ieid jaidbynriew, bad lada dei ba ieid pyni katno tylli ki aiñ u Bah Ardent u la wanrah ha ka por ba u long CEM, ym don bad don tang ka Executive Order ba u la wanrah ban pynkylla jait kpa.
“Ym dei ban shim kabu ïa ka jinglui-lui jong ki briew, ban shu leh katba mon, ngim donkam ban peit ka sur ne tyngam ba jam, hynrei ngi donkam ïa u briew ba lah ban trei. Ka jinglong ki VPP ki long kum u khiew phyrnai nabar, ba sawa ka sur, u bym don eiei bad thylli pat,” la ong u Bah Pynïaid.
