Shillong, Ïaïong 08
Hadien ba la lah ban sei ïa ki khynnah ïalehkai ba kynsai kiba la ïoh rung sha ka Super Elite Pathway Program (SEPP), ka Meghalaya State Olympic Association (MSOA) ka donkam ban ïoh ïa ki nonghikai ba pura na ka bynta ban saiñdur bad ban ai jinghikai pura ïa ki khynnah.
Kumba ka paw ha ki snem ba la lah, ka MSOA ha ryngkat ka jingïatrei lang ka tnat ïalehkai jong ka Sorkar Jylla lem bad kawei ka kynhun kaba na Australia, ka Edge 10 hapoh ka jingïalam u Ian Campbell, la lah ban pynlong ïa ka jingwad khynnah kylleng ki district jong ka Jylla na ka bynta ban ithuh ïa ki sap ïalehkai ba kyrpang jong ki.
Ha katei ka jingwad khynnah la lah ban ithuh ïa ki sap ba kyrpang jong ki khynnah bad napdeng ki hajar ngut, la lah ban jied ïa kiba kham kynsai bad mynta ki la don sa tang hynriew ngut.
“Haduh mynta ki la don 6 ngut ki khynnah kiba hap hapoh ka Super Elite Pathway Program. 2 ngut ki khynnah ki dei ha ka jingïalehkai weightlifting bad 4 ngut pat ha ka jingïalehkai athletic,” la pynpaw u General Secretary ka MSAO u Bah Finely Pariat haba ïakren bad u nongthoh khubor.
“Ha ka jingshisha ha kine ki shi snem la wan ïarap ban ai jinghikai da u coach uba la don hapoh ka tnat ïalehkai jong ka Sorkar Jylla, hynrei mynta ngi la donkam da ki coach ba pura (Coach/Assistant Coach) ki ban ai jinghikai ïa kitei ki khynnah hapoh ka jingkhmih da ka kynhun jong ka Edge 10,” u la bynrap.
“Kino kino ki coach kiba don jingthmu ban wan shimti ïa kane ka kam ki lah ban phah ïa ki kot ki sla sha ka shlem trei kam jong ka MSOA kaba don ha J.N. Complex, Polo.
