Shillong Ïaïong 08
Ka BJP ha Meghalaya ka la pynpaw ka jingsngew skhem ba ka kynhun National Democratic Alliance (NDA) kan ïoh jingjop ha kane ka ilekshon na Tura Lok Sabha konstitwensi namarba ka BJP bad ka National People’s Party (NPP) ki la ïakynduh lang ha Tura bad poi sha ka jingsngewthuh jingmut.
Ha u kyrwoh ba la pyllait da ka BJP ha ka Lah Sngi U Blei, la ong ba kine ki shiparalok (NPP bad BJP) hapoh ka kynhun NDA ki la ïakynduh ha Tura ha ka Sngi U Blei na ka bynta ban ïa sngewthuh lang ha kane ka jingïakhun ka Agatha K Sangma kaba dei ka kyrtong ka NPP.
Ïa kane ka jingïakynduh la lamkhmat da u National President ka NPP u Conrad K Sangma bad u President ka BJP ha Meghalaya u Rikman G Momin.
Kane ka jingïakynduh ha Tura ka dei ka jingïakynduh ka ba-ar hapdeng ki nongïalam kiba hakhmat eh jong ki ar tylli ki seng bad ka jingïakynduh kaba kham hashwa ka dei ha Shillong.
Na ka liang u Myntri Rangbah u Conrad K Sangma u la pynpaw ha kane ka jingïakynduh ba kane ka dei ka jingïalum kaba wanrah ka jingïajan kaba la ïaid la palat 10 snem. U Conrad u la ong ba ki ‘vote’ ba ai ïa ki kyrtong ka NDA ka dei ka jingpynskhem ïa ka jingshaniah ki paidbah ïa ka jinglong nongïalam u Myntri Rangbahduh u Narendra Modi.
Ar ngut ki MDC ka BJP u Bernard Marak bad u Benedict Marak, ha ryngkat palat 300 ngut ki nongïalam bad nongtrei jong ka BJP ki la donlang ha kane ka jingïakynduh. Ka jingshimbynta shitrhem bad ka jingkut jingmut ban pynjop ïa ka NDA da ki no gtrei ka abJP ha Rilum Garo ka la weng ruh ïa ka hamsaïa kaba sdang ban airong ïa ka jinglong jong ki nongtrei ka BJP ha Shillong bad Tura.
U Myntri Rangbah u la ai jingïaroh ruh ïa u President ka BJP u Rikman G Momin uba la pyntikna ba ka jingsngewthuh lang kum ka kynhun kan don. U la ong ba ka thong ka long tang kawei ka jingmut jong u ban shim ïa ki lad ban pyntikna ba ka jingjop jong ka NDA ka long ka nuksa ïa baroh.
Shuh shuh ka BJP ka la ther ruh ïa u nongïalam ka TMC u Dr Mukul Sangma uba la kynnoh ba ka Congress lyngba u kyrtong jong ka, u Bah Vincent H Pala u dei u nongsaiñdur ïa ka jingïadei hapdeng ka BJP, NPP bad ka Congress.
U la ong ba ka BJP ha Meghalaya ka kyrshan ïa ka NPP ha ka Sorkar Jylla bad ban ong ba ka don ka jingïadei bad ka Congress, ka dei tang ka jingkren kaba khlem don nongrim ei ei.
