Shillong, Ïaïong 08
Uwei u rangbah ba la tip kyrteng kum u Bah Mahamsing Sten, 38 snem ka rta na ka shnong Klew kaba don ha ki thaiñ Kyrdem Ri-Bhoi, ha ka Sngi U Blei ka 7 tarik u Ïaïong 2024 ha ka por kumba 1 baje u la khlad hadien ba ngam jyllop ha ka pung Umïam kaba dang hap hapoh ka shnong Umñiuh Khwan katba ki dang thmu ban leit jam sha shilang ka wah ban leit bamkhana sngewbha.
Ka jingngam jyllop jong une u rangbah ka dei na ka jingngam jong ka lieng kaba ma u bad ki paralok jong u ki la shnong na ka daw ka jingjur ka lyer. Sa kawei ka daw ka dei ruh namar ka lieng kaba ki la shong ka la khia namar ba ki shong bun ngut ne haduh 6 ngut kynthup ïa uwei u khynnah uba dang 10 snem ka rta uba dei ruh u khun jong une u rangbah ba la khlad noh ha kane ka jingjia.
Haba ïoh ban ïakren bad ki samla ka shnong Umñiuh Khwan kiba la leit ban sei bad ai jingïarap ïa kitei ki briew ba la ngam hapoh ka pung, ki la ïathuh ba mar sien ïohsngew ïa ka sur pyrta jingïarap, kumta ki la leit ban mareh bran-bran sha katei ka pung.
Ki la ïathuh ruh ba ha ka por ba ki la poi ha katei ka pung ki la lap ba ka lieng ka la ngam bad ki don katto-katne kiba la poi sha lum bad ki la lah ban ïarap sei ïa u khun, hynrei ïa utei u rangbah uba la ngam jyllop ha katei ka pung pat ki khlem lap dien shuh satia.
Na ka jingtrei shitom ki briew ka shnong ha ryngkat bad ki pulit ka SDRF ha ka Lah Sngi U Blei ka 8 tarik u Ïaïong 2024 ha ka por kumba 10 baje mynstep, ki la lah ban sei noh ïa ka met jong utei u rangbah bad na ka liang ki pulit ka thanat Umïam ki la wan ban tohkit bad leh ïa kaba donkam.
Na ka liang u Bah Jeling Tamu uba dei uwei napdeng ki rangbah uba la wan bamkhana lang sha ka pung Umïam ha ryngkat bad u Bah Mahamsing Sten, u la ïathuh ba shwa ba katei ka lieng ba la shong da ki 6 ngut kan ngam, u la don lypa sha shiliang katei ka wah namar u la poi shwa ma u ban ïa ki.
U la ïathuh ba ma u bad sa uwei pat u paralok jong u ha ryngkat bad u nongñiah ïa ka lieng ki la leit sha shiliang jong katei ka wah bad ynda katto-katne eiei, utei u nongñiah ïa ka lieng u la leit shaw sa ïa kitei ki 6 ngut na shiliang jong ka wah.
Nalor nangta, u la ïathuh ba ka lieng ka ngam namar ka la khia palat ha ka jaka ba kin shong 3 ngut hynrei ki la shong haduh 6 ngut kaba la pynlong pat ïa ka lieng ba kan ngam shapoh um.
Shuh shuh u la ong ba mar sien ngam katei ka lieng, u la pyrta sha shnong Umñiuh Khwan na shiliang ka wah ban pan jingïarap ban pyllait im ïa kitei kiba la ngam shapoh um namar ïalade ruh um lah ban leh eiei namar u don sha shiliang ka wah bad um don lieng satia ban leit ïarap ïa kitei kiba la ngam shapoh um.
“Mar sien ïohi ba la ngam ka lieng, nga lah shu pyrta briew bad ba ngan mareh hi ruh ngam lap shuh, nga la shu pyrta noh sha shiliang bad ha kata ka por ki la wan ki para shnong”, la ïathuh u Bah Tamu.
U la ong ruh ba lada um don ha katei ka por yn nym lah ban pyllait im shuh ïa kiba la ngam hapoh ka um. Hynrei hadien ba u la pyrta jingïarap ki la wan mareh bran-bran ki samla napoh ka shnong ban wan ai jingïarap bad sei ïa kitei kiba la ngam hapoh um khamtam ïa utei u khynnah uba dang 10 snem ka rta.
