Babu Kular Khongjirem
Ha kine ki khyndiat bnai ba la dep, ka jingkhmih lynti ki paidbah ka ri Khasi-Jaiñtia ban pynthymmai biang ban ïoh jied thymmai (re-election) ïa ki nongmihkhmat (MDC) sha District Council ka la pulom noh hadien ba ka Sorkar MDA-II hapoh ka jingïalam ka NPP (UDP+BJP, ter ter), ka la rai ban pynjlan noh (extend) shwa ïa ka ilekshon sha District Council hadien sa 6 bnai pat.
Kane ka rai ka long ka bym pat ju kham jia koit ha ri Khasi-Jaiñtia (lait noh ha Garo Hills) ba ka sorkar ba la jied da u paidbah (elected Govt.) ba kan pynkheiñ pylleiñ-pylleiñ ïa ka riti ka dustur jied nongmihkhmat paidbah (traditional democracy) naduh kito ki por ba la kha ïa ka District Council ha ka jylla jong ngi.
Bun ki paidbah kim da salia ne suitñiew than eh ïa kum kane ka raibi (precedence) kaba la leh khyllah da kane ka sorkar hynrei ka long ka jingma kaba shyrkhei bha namar ka jingïaid lait bad ïuhroit ïa ka hok longtrai (democratic rights) jong ki paidbah ka ri Khasi-Jaiñtia jong ngi ban jied nongmihkhmat shisien san snem. Kumno kin ïakren ban pynneh-pynsah ïa kata ka riti ka dustur u paidbah haba ki la dep pynkheiñ bad ïuhroit lypa ïa ka hok u paidbah ban jied MDC ha man la ka shisien san snem tang na i daw bym shongnia (unjustified reason)?.
Ym dei tang katta, hynrei don kiba peit thuh bha ba kane ka sorkar kan sa pynjlan (extend) shuh shuh ïa ka por treikam (tenure) jong kine ki MDC shu thung (political appointees) sa sha ka 6 bnai shuh shuh namar hapoh u bnai Nailur (September) ba la kut kane ka por (extended tenure), ka dang dei ka por slap ym pat long, kin hap rah biang sa 6 bnai eiei haduh ban da poi syndon ka por tlang. Ki shu ïalehkai (play politic) katba mon kat ïa ka hok jong u paidbah ruh. Shaei kane kan ïalam? Ki paidbah ki tip kham bha ïa kata.
Ha ka jingshisha, shisien ba la kut hok ka por ne ka samoi treikam jong ki (tenure), la dei ban sngew lehraiñ ban khot MDC ïa ki. Ki dei bad ïasyriem tang kum ki MDC ba la thung bad isynei ka sorkar ïa ki (just political appointees only) ban dang ïoh ka tulop suk, ka bai leit-bai wan (allowances) ter ter, ban ïoh kjit suk ïa ka pisa u paidbah khlem da shah jied shuh da u paidbah ïa ki.
Ban shu leh mon ne lehkai ïa ka hok u paidbah ym ju long. Ki ju ong, Ki khun ïoh mon kim ju long eiei. Ban shu lehbeiñ ïa ki ba rit ba ria (paidbah) ruh ym ju long namar kan sa poi ka por ba uba rit ba ria (voters) ruh u don la ka jong ka bor ha kawei ka sngi. Ka ktien ka ju ong te, ‘Uba rit ruh (u paidbah) u don la ka kylla (ka bor ba triem), lada ngi leh beiñ ïa u, ka long kaba triem ynda u la khie thiah (ka bor ba triem por election). Kynmaw bha, ‘Lada ngi leh beiñ ïa kiba tlot, ngin sa liem pat ha kiba kham khlaiñ’. Wat ong ne kop than ba phin jop lut ïa ka pyrthei. Kat u Kyieng uba pynliem kat ïa u Sing, u la ngat ka apot bad shah pynïap pynban tang ha ka khñiang thapbawa kaba rit. ‘Biang hawei, duna hawei, ym don ba janai’.
