Kolkata, ïaïong:
Ka saiñ hima-sima ha ka jylla West Bengal ka la khihwin hadien ba ka kynhun National Investigation Agency (NIA) ka la shah thombor ha Bhupatinagar kaba don ha East Midnapore distrik ha ka Sngi Saitjaiñ ha ka por ba ka la don ka jing-leit khynra ha kaba ïadei bad ka jingtohkit halor ka jingjia jong ka jingbthei bom ha u snem 2022.
U Myntri Rangbahduh u Narendra Modi bad ka Myntri Rangbah jong ka West Bengal ka Mamata Banerjee ki la ïa pyni nia bad kdew-kti markylliang ha kaba ïadei bad ka jingjia, katba ki nongïalam jong baroh arliang ki la ïamir jingmut bad ïakren halor kane.
U Modi u la kynnoh ba ka Trinamool Congress ka la pynsniewdur ïa ka Riti synshar bad ka la pyrshang ban ai jingïada ïa ki nongïalam kiba donkti ha ki kam bamsap.
Ka Mamata Banerjee, ha kawei pat ka liang, ka la pynshisha da kaba ong ba ki kynhun tohkit jong ka sorkar kmie ki la byrngem ïa ki nongïalam jong ka seng Trinamool bad hukum ïa ki ba kin leit ban pynïasoh bad ka seng BJP.
” Ka TMC ka la kwah ban pynïoh Licence na ka bynta ki nongïalam kiba bamsap ha kaba kin lah ban nang bteng ïa ka kam. Na kata ka daw haba ki kynhun tohkit jong ka sorkar kmie ki leit sha West Bengal, ka seng TMC ka ju thombor bad pynibor pyrshah ïa ki. Ka TMC ka dei kata ka seng kaba kwah ban pynduh pyndam ïa ki rukom pyntreikam jong ngi bad jong ka Riti synshar,” la ong u Myntri Rangbahduh ha ka jingïalang paidbah kaba la long ha Jalpaiguri ha West Bengal ha ka sngi U Blei.
U Modi u la pynshisha ruh da kaba ong ba ka seng TMC, Left, bad ka Congress ki la thaw kawei ka kynhun synrop ka INDIA na ka bynta ban ai jingïada ïa ki nongïalam kiba bamsap hapoh ki seng jong ki. Ka Mamata Banerjee ka la kynthoh kylla ïa ka seng BJP, ha kaba ka la kynnoh pyrshah ïa ki kynhun tohkit jong ka sorkar kmie ba ki kynhun tohkit kum ka Enforcement Directorate, CBI, NIA, bad Income Tax Department ki la treikam kum ki kti jong ka seng BJP
.” Ki kynhun tohkit kum ka NIA, ED bad CBI ki la shah pyndonkam na ka bynta ban leh donbor pyrshah ïa ki nongïalam jong ka seng TMC. Ki la pynlong ïa ki jingleit khynra khlem ka jingai jingtip hashwa, bad rung hapoh ki ïing. Kumno ki kynthei kin leh lada don kiba rung hapoh ïing jong ki haba baroh ki dang ïap ïohthiah ha ka por mynmiet?” ka la buh jingkylli. Ka la pynshisha da kaba ong, “Ki kynhun tohkit ki la ong ïa ki nongïalam jong ngi bad ïa ki nongbud jong ka seng la kin leit ban pynïasoh bad ka seng BJP ne kin shah pynngat ha ki kyndon aiñ”.
Ha kaba ïadei bad kane, ka kynhun NIA,ka la pynmih ka jingthoh ha ka Sngi U Blei ha kaba ka la kyntait halor kane ka jingpynshisha halor ka jingleit khynra ïing kaba la long ha ka sngi Saitjaiñ bad ong ba ka jingshah thombor jong ki heh ka kynhun ka long ka bym lah ban pdiang.
