Maputo, Iaïong:
Katkum ki khubor la ong ba palat 90 ngut ki la khlad na ka jingngam bad kylla ka lieng ha ka duriaw sha ka phang Shatei jong ka Mozambique ha ka Sngi U Blei.
Katei ka lieng tong doh ka dei kaba kit ia kumba 130 ngut ki briew kiba shong ha ka, hynrei ka la kylla noh shuwa ba kan poi sha katei ka dew lynnong Nampula.
Namar ba katei ka lieng ka la kit bun palat ki nongshong, kumta la ong ba ka long kaba kloi ia katei ka lieng ba kan kylla, ha kaba 91 ngut ki la khlad noh syndon ha katei ka jingjia.
Shuh shuh ruh la ong ba kham bun na kitei kiba khlad ki dei ki khynnah.
Ki tnat iarap ki dang lap tang ia ki 5 ngut kiba im bad kiba dang lah ban pyllait im na katei jingjia bad ki dang wad ruh sa ia kitei kiba dang jah rngai.
Namar la ong ba bun na kitei kiba shong ha katei ka lieng ki dei kiba thmu ban phet noh na katei ka jaka namar ka khubor lamler halor ka jingpang ïap-them (Cholera).
Katei ka ri Africa ka long kawei na ki ri kaba duk tam, ha kaba ki don haduh palat 15,000 tam kiba ioh ia ki jingpang kiba pur na ka um bad kumba 30 tam kiba la khlad na katei ka jingpang kaba la sdang naduh u Risaw jong u snem ba la leit.
Bad la ong ba ka Nampula ka long kawei na ki thaiñ kiba la shah ktah jur bha ha katei ka jingpang.
