Mairang, Ïaïong 08
Ha ka 5 tarik mynta u bnai, ki pulit ka Mairang ki la ïoh ban khwai noh ïa kawei ka met ïap jong u shynrang briew kaba la jan kem pyut.
Ha ka kyrwoh khubor ba la phah da u Superintendent of Police (SP), Eastern West Khasi Hills u la ong, ha ka 5 tarik mynta u bnai la ïoh ban khwai ïa kawei ka met ïap jong u shynrang kaba la jan kem pyut, uba dei u Khasi na ka Kshaid ThupThup kaba don ha Weimynsier hapoh ka Eastern West Khasi Hills bad la pynrung ïa ka mukotduma ha thanat Mairang.
Shuh shuh u SP ha ka kyrwoh khubor u la ong ruh ba halor katei ka jingjia la dep ruh ban pyntip sha baroh ki thanat kiba don hapoh ka Meghalaya bad ki jylla marjan khnang ban ithuh ïa katei ka met ïap.
La ïathuh ruh ba utei uba ïap u don ka rynïeng kaba 5 phut, ka rta hapdeng 25 haduh 30 snem, u phong ka patlun rong ïong, ka sopti rong ktieh bad ka patlun poh rong ïong bad la lap ruh ïa kawei ka jingtbeh ding (torch light) rong saw napoh ka pla jong utei uba ïap.
