Shillong, Ïaïong 08
Ka Shillong Lajong FC ka la ïoh jingjop ha kaba sdang ïa ka ‘Shillong Leg’ na ka bynta ka lympung ïalehkai Dream Sports Championship (U-17 National Football Tournament), katba ka Rangdajied United FC ka la ïakhaid mar 1-1 kol pyrshah ïa ka NRL Football Academy ha ka Lah Sngi U Blei ha kane ka nongbah.
Ha kane ka jingïakhun kaba nyngkong ka Shillong Lajong ka la lah ban pynliem noh ïa ka Golden Lion FC da 3-1 kol.
Ha kane lympung ba la pynïaid da ka Dream Sports Foundation bad la kyrshan lang da ka All India Football Federation (AIFF), ki la don hynriew tylli ki kynhun. Kine ki kynthup ïa ka Shillong Lajong FC, Lah Bet FC, Golden Lions Football Coaching Centre, Rangdajied United FC, Football 4 Change bad ka NRL Football Academy.
Ïa kine ki kynhun la phiah ha ar tylli ki group bad tang ar tylli ki kynhun kiba wan ha ki kyrdan ba hakhlieh na kitei ki group kin ïoh rung sha ka final ka ban long ha ka 13 tarik mynta u bnai.
Ka jingpynlong ïa ka DSC ka long ban plie lad ïa ki kynhun kiba khur ïa ka nam lahduh ba kin pyni ïa ki sap ïalehkai haduh ki lympung ïalehkai kiba heh. Da ka jingïasnoh-kti lang bad ka AIFF, kane ka lympung ka la plie lad ruh ïa ki rangïalehkai kiba kynsai ba kin shah jied ban ïoh rung sha ka prokram kilanmet jong ka ri ka ban long ha u Jylliew mynta u snem.
Ïa kane ka lympung la dep pynlong ha Mumbai bad Kolkata naduh ka 1 tarik mynta u bnai. Kiwei pat ki wat jingïakhun kin long ha Delhi, Bengaluru bad Goa. Kumta ïa kane ka lympung la khmih lynti ban pyndep ha ka 18 tarik mynta u bnai. Ki kynhun kiba don ha ka thup kaba phra kin ïoh rung sha ka wat kaba khatduh ka ban long ha u Jymmang ha Mumbai.
