Ngim dei ban sngew phyllaw ïa ka rukom ai jait kheiñ jait ha ngi ki Khasi. Namar ka rukom ai jait kheiñ jait na ka kmie ka pynkha roi ïa u symbai mynder. Balei hap ban ong, kumta namar ka la paw tyngkreiñ bad paw shynna ym lah ban buhrieh ïa kane ka dustur khyllah kheiñ jait kmie kaba la pynbyrsieh ïa ka jaitbynriew lyngba ka shongkha khleh bad da ka snam ki bym dei Khasi paka. Namar ïa ki khun shipiah ne ki khun ki kpa bym dei Khasi la ñiew nongwei ha kane ka dustur jong ngi.
Balei namar ïa ki khun na ka kmie Khasi bad u kpa Khasi, ka dustur aiu ka bym long shuh ban ai jait sha u kpa para doh para snam. Ha ka jingshisha ka ai jait sha u kpa ka long kaba bha tam eh ban lait na ka shong sang. Mynta lei lei la dap tang ka snam jong ki khun jong ki kpa bym dei Khasi, katba ka jait ka dei ka jait jong ka kmie. ïa ki khun kpa Negro bad kiwei kiwei bym dei Khasi ruh la ai jait beit sha ka kmie kum ka dustur Khasi ki ong. Kane te ka dei ka dustur pynduh pyndam ïa ka jinglong khasi nylla. Na phi ong nga thoh bad kren beiñ jaitbynriew. Em, kam long kumta namar ka jaitbynriew Khasi kan sa duh jait khlem pep ha ki por ban sa wan. Ne n gi kwah ba ka jaitbynriew jongngi kan jyllei bad satah da u symbai nongwei ha ka kyrteng ai jait kmie.
C. B. Iawphniaw
