Shillong, Ïaïong 08
U President ka Voice of the People Party (VPP), Bah Ardent M. Basaïawmoit u la ong ba ka seng kam ju bsa ïa ki paidbah kiba wan sha ka jingïalang da kaba sniew, hynrei da ka jingshisha bad ka jingkyrmen.
Haba ai jingkren ha ka jingïalang kaba la long ha Umsning, Ri-Bhoi ha ka Lah Sngi U Blei, u Bah Basaïawmoit u la ong ba ka don ka jingïapher hapdeng ka VPP bad kiwei pat ki seng saiñ pyrthei bad ki paidbah haba ki wan sha ka jingïalang ka VPP, haba ki leit sha la ki ïing ki sem, ki dap da ka jingkyrmen bad ki ïohthiah suk thiah saiñ.
Ha kawei ka liang, u la ong ki jingïalang jong kiwei pat, ka don tang ka jingkynthoh bad ka jingbeiñ pyrshah ïa u.
“Phi wan sha ka jingïalang jong ngi, phi leit phai sha ïing khlem sha ruh, sngew lah kdang…da leit bad kiwei pat ki seng, ïoh doh sniang, doh syiar, kiew sa ka BP,” u la ong.
U la ong ruh, “Phi wan ha ka jingïalang jong ngi, ngin ym bsa ïa phi ki paidbah da kaba sniew, ngi bsa da kiei-kiei kiba bha, da ka jingshisha, da ka jingkyrmen…ym dei ban shu pyntieng.”
Haba kdew ba ki jingïalang mynta ki dap sa tang da ka thok ka shukor bad ka jingïalam bakla, u Bah Basaïawmoit u la ong, “Dang mynnin ne mynshisngi, u CEM ba shu thung jubor da ka Sorkar, u CEM ym dei ba la jied da u paidbah, hynrei uba la thung jubor da ka Sorkar, u la pyrshang ban kynthoh bad ban ong ba ki nongïalam lane kita ki briew jong ka VPP ki sdang ban thaw jingkulmar.”
Halor katei ka jingkynnoh, u President u la ong ba ka seng ka la shimkhia ïa katei ka jingkynthoh, bad ka la phah ïa u (CEM) ban pynshisha halor katei ka bynta.
“Mynta imat ban poi sha ka thong kim lah shuh, ki la sdang sa ka wad lad kumno ban pynmih ïa ki jingkren khohñioh mynsiem ïa u paidbah ba u paidbah un ong ba une u VPP u leh shongshit,” u la ong.
Na ka liang utei u nongïalam u la kyrpad ïa ki paidbah ba kin ym ngeit kulmar ïa ka khana ka khlieng ka tyngab naba ka long kaba ma.
Shuh shuh u Bah Basaïawmoit u la bynrap, “Mynta kine kin pyrshang ban wad daw, mynta kine kin pyrshang ban kynthoh…ki la sdang ban kynthoh, ngi ruh na ka seng ngin ai ka jingthoh sha ki bor ba dei khmih namar kum kine ki jingkynnoh bym shong nongrim tang ban pynbieit paidbah, ngin ym ai lad da lei-lei ruh.”
