Jowai, Ïaïong 08
Haba kren siat ïa ki nongïalam jong ka Voice People of Party (VPP) kiba mlien put turoi ïa ki mat kiba ki leh, u Working President jong ka United Democratic Party (UDP) bad u Myntri Sorkar, u Bah Paul Lyngdoh, u la ai nuksa shaphang u masi ïa dur ba pynshongshit ha ka ïew ha hat bad shaphang u masi lur uba lur ïa ka lyngkha ha ka jingjar-jar ban mih ka rep ka riang bad kumta u paidbah u dei ban bishar ïano u kham lah – u masi ïa dur ne u masi lur.
U Bah Paul u la pynsngew ïa kine ki symboh pyrkhat ha ka jingïalang ïalap ilekshon jong ka Regional Democratic Alliance (RDA) ha Ïawmusiang, Jowai ha ka Lah Sngi U Blei.
Halor ka jingtyrwa ïakob ïatai nia halor ka mat kaba ïadei bad ka Meghalaya Urban Development Authority (MUDA) da u President jong ka VPP u Bah Ardent M Basaïawmoit, u Working President jong ka UDP u la ong ba um donkam shuh ban ïatai nia halor katei ka mat namar ha ka por ba long u CEM jong ka KHADC u Bah Titos Chyne bad ma u kum u EM jong ka KHADC ki la dep pynbeit ïa katei ka kam MUDA bad ka sorkar Meghalaya hadien lai tylli ki jingïalang ha ka jingdon ryngkat jong u Bah Robertjune Kharjahrin kum u nongaibuit jong ka KHADC.
U la bynrap ba ka sorkar Meghalaya ka la mynjur ban pynkhamti noh ha ki District Council ïa ki jaka khap sor ban ai jingbit shna ïing katkum ka Meghalaya Building Bye Laws.
Haba phai dien sha ki mat ba u la noh synñiang na ka bynta ka bha ka miat jong ka jylla, u Bah Paul u la ong ba ka sorkar jylla hapoh ka jingïalam jong u Dr. D.D. Lapang ka la hap pynduh pyndam noh ïa ka jingthmu jong ka Sorkar ban ai jingbit ïa ka UCIL ban tih Uranium ha Nongbah Jynrin, South West Khasi Hills hadien ka jingtuklar jong ka seng KHNAM kaba u la don mynshwa.
U la ong ba ka sorkar jylla ka la pynduh pyndam ïa katei ka jingthmu hadien ba ka Komiti kaba la thung kyrpang da ka Sorkar kaba la kynthup ïa ki myntri sorkar bad ka KSU ki la aiti ïa ka kaiphod jong ki hadien ba ki la wanphai na Jadugoda.
U Bah Paul u la ong ruh ba u la iehnoh ïa ka shuki Myntri na ka bynta ban ïakhun ban ym ai lad ïa ka sorkar ba kan pyntlot ïa ka MBoSE.
