Bengaluru, ïaïong:
U Myntri Rangbah jong ka Karnataka u Siddaramaiah ha ka Sngi U Blei u la pynshisha da kaba ong ba ka Myntri ba dei khmih ïa ka tnat pla tyngka ka Nirmala Sitharaman ka la shukor haba ka la ong ba ïa ka pisa jingïarap na ka bynta ki lanot kiba ïakynduh jingeh na ka jingrang tyrkhong ym shym la pyllait namar ka jingtreikam jong ka Model Code of Conduct (MCC).
Ha ka jingïakren bad ki nongthoh khubor ha ka Sngi Saitjaiñ, ka Sitharaman ka la ïaleh ban ïada rapjot ïa ka sorkar kmie da kaba ong ba ka jingpyllait ïa kane ka pisa kan sa shim por namar ka jingtreikam jong ka MCC.
Ka la ong ïa kane, hadien ba ka sorkar Karnataka ka la phah ïa ka dorkhas ha u Risaw bad ka kynhun jong ka sorkar kmie ka la pynlong ïa ka jingleit jurip bniah ha ki jaka ba la shah ktah jur, ïa ka pisa jingïarap halor ka jingrang tyrkhong yn sa phah bad kane kan sa shim por.
Kumba la ïathuh ka Myntri ka tnat pla tyngka, la ong ba ki heh ba dei khmih jong ka sorkar kmie ki la phah jingthoh sha ka Election Commission ha ka 28 tarik, Lber na ka bynta ban ïakren bad ban pan ka jingmynjur na ka High-level Committee, halor kane, ha kaba la ai jubab ba mynta ka dang treikam ka Model Code of Conduct bad ka jingai jubab jong ka EC ka long ban hap ban ap bad ïaishah na ka bynta ka pisa ban ai jingïarap halor ka jingrang tyrkhong.
U Siddaramaiah u la ong ba ka jylla ka la dep ban phah ïa ka dorkhas na ka bynta ban ai jingkyrshan pisa halor ka jingrang tyrkong ha u Nohprah bad kyntait halor kane ka jingpynshisha ha kaba ha ka jaka ban ai jingïarap, la ong pynban ba ka Karnataka ka la wan ba-ar halor ka jinglum khajna ha ka ri, ka sorkar kmie kam shym la pyllait ïa ka pisa ba la dei ban ai jingkyrshan halor ka jingrang tyrkong ha ka jylla.
