Shillong, Ïaïong 08
U kyrtong shimet ha kane ka ilekshon ban wan sha ka Lok Sabha na Shillong Parliamentary konstitwensi, u Prof. Lakhon Kma u la ong ba lada ki paidbah ki ai lad ïa u (ha kane ka ilekshon MP), un long ka sur jong ki ha Parliament bad un ïaleh katba lah ban wanrah ïa ka roi ka par sha ka Jylla.
“Nga kwah ba phin ai lad ïa nga bad ba ngan rah ïa ka sur jong phi sha Parliament. Ngi kum ki nong Meghalaya, ngin pynsawa ïa ka sur ha Parliament bad ban ong – ngi kwah tang ka roi ka par bad ym kawei-kawei. Ym don da kawei pat ïa nga lait na ka roi ka par,” la ong u Prof. Kma haba ai jingkren ha ka jingïalang ïalap ilekshon kaba la long ha ka Lah Sngi U Blei ha Them Basuk, Madanrting.
Haba kdew ba lada don ka roi ka par, baroh kin ïaid beit ha ka rukom kaba dei, utei u kyrtong u la ong, “Ka ‘agenda’ jong nga ka long ban ym pdiang da lei-lei ruh ïa ka bamsap bad ki kam ba ïadei bad ka bamsap. Lada ngi lah ban pynduh jait shi syndon ïa ka bamsap, ngin don pahuh ka pisa na bynta ka roi ka par.” Na ka liang u Prof. Kma u la kren ruh halor ka ‘MP Education Fund’ ka ban ïarap ïa ki khynnah pule na ki longïing ba duna ka ïoh ka kot lada jia ba u ne ka nongkyrshan jong ki, ki mad ne ngat ha kano-kano ka jingjia ba sngewsih khnang ba ka jingpule jong ki khynnah kan ym shah ktah.
“Lada phi phah ïa nga sha Parliament, ngam nang ban leh eiei lait na ka jingminot, kumta ngan minot na bynta jong phi, na bynta ki khun ki kti jong phi khnang ba ngin ïoh ïa ka lawei baphyrnai na bynta ka Jylla bad kane kan urlong tang lyngba ka jingkyrshan jong phi,” u la ong.
Haba pynshai sha ki paidbah halor ka shang ba dap da ki soh – ka shap jong u ha kane ka ilekshon ban wan, u Prof. Kma u la ong ba kane ka shang ka dei ka Meghalaya katba ki soh kiba don ha ka ki dei ki mat treikam jong u.
“Ngan pyrshang katba lah ban wanrah kata ka roi ka par ha ki bynta bapher-bapher jong ka imlang-sahlang bad ba ngin ïa san bad ïa kiewlang, ban ïa bit ïa biang nadong-shadong khamtam ha ki nongkyndong. Kane ka dei ka thong jong nga,” u la ong.
U la ong ruh ba uwei-pa-uwei u soh uba don ha ka shang ki dei ki mat treikam jong u bad u kwah ban pynurlong ïa ki lada ki paidbah ki ai lad ïa u.
“Ngam tip kan shim por katno, 15-20 snem ngam tip. Haba ngi trei, ngin pynurlong, ngin minot bad ngin ïoh ïa u soh bathiang jong ka jingjop,” u la ong.
Shuh shuh utei u nonghikai ka skulbah NEHU haba kyrpad ïa ki paidbah ban ym pynsepei ïa ka ‘vote’, u la bynrap, “Lada phah ïa u briew uba shong kli kti ha Parliament bad u bym rah ïa ka sur jong phi, ngin ym poi shano-shano. U paidbah mynta u la shai, u la shemphang, u la sngewthuh namar donkam ban sngewthuh ïa kata bad kumta nga kyrpad ba phin ai ka ‘vote’ ïa nga.”
